ისრაელის საჰაერო დარტყმების შედეგად 16 ადამიანი დაიღუპა, - ინფორმაციას ლიბანის ჯანდაცვის სამინისტრო ავრცელებს. ლიბანის ჯანდაცვის სამინისტროს ცნობით, ქვეყნის აღმოსავლეთში ისრაელის საჰაერო იერიშების შედეგად 16 ადამიანი დაიღუპა, ხოლო 35 დაშავდა. ასევე, უწყებაში აღნიშნეს, რომ მას შემდეგ, რაც მიმდინარე კვირაში ისრაელსა და „ჰეზბოლას“ შორის დარტყმები განახლდა, ლიბანში 200-ზე მეტი ადამიანი დაიღუპა.

შვედეთმა უკრაინის მიერ დასანქცირებული სატვირთო გემი დააკავა, - ინფორმაციას შვედური მედია ავრცელებს. „გემი უკრაინის სანქციების სიაშია. მისი საკუთრების სტრუქტურა დაუდგენელია და არსებობს ეჭვი, რომ დაზღვეული არ არის. გასულ ზაფხულს გემმა რუსული დროშა გვინეის დროშით შეცვალა“, - განაცხადა შვედეთის სამოქალაქო თავდაცვის მინისტრმა, კარლ-ოსკარ ბოლინმა. გამოცემა SVT უკრაინულ მხარეზე დაყრდნობით წერს, რომ გემი რუსეთის მიერ დროებით ოკუპირებული ყირიმიდან მარცვლეულის ქურდობაში იყო ჩართული. შვედეთის სანაპირო დაცვის განცხადებით, გემი სანქტ-პეტერბურგში მიცურავდა.