არასრულწლოვანის მიმართ განხორციელებულ ძალადობაში ბრალდებულ მკლავჭიდელის, ხატია ვიბლიანის საქმის პროკურორის, ნათია ნოზაძის განცხადებით, დაზარალებული 15 წლის ბიჭის ოჯახს ბრალდებულის კანონის სიმკაცრით დასჯა სურს.
როგორც პროკურორი განმარტავს, გირაოს მოთხოვნის მომენტში მათ გაითვალისწინეს ის ფაქტი, რომ ბრალდებული ქალი მარტოხელა დედაა, ის 4 წლის შვილს ზრდის და ამასთან ნასამართლევი არაა.
ნათია ნოზაძის თქმით, ვინაიდან მომხდარ ინციდენტს ხატია ვიბლიანის 4 წლის შვილიც შეესწრო, აღნიშნულთან დაკავშირებით საქმის კურსში ჩააყენეს სოციალური სამსახურიც, სწორედ მათ უნდა შეისწავლონ და მონიტორინგი აწარმოონ, თუ რა პირობებში ცხოვრობს 4 წლის ბავშვი.
„დაზარალებული არასრულწლოვანი კონკრეტულ გარემოებებზე უთითებს, თუ რა იყო მიზეზი და რამ გამოიწვია ბრალდებულის მხრიდან ძალადობრივი ქმედებების ფაქტი. არასრულწლოვანი ასევე უთითებს იმაზე, ვინაიდან მოძალადე ქალი იყო, თავად საპირისპირო სახის ქმედებები არ განახორციელა, უბრალოდ თავდაცვის რეჟიმში იყო ძალადობრივი ქმედებების დროს.
რიგი იყო მაღაზიაში, რადგან ბრალდებულს მცირეწლოვანი შვილი ახლდა, ქალბატონმა რიგის დათმობა ითხოვა, ერთი ცალი „ჩიფსი“ უნდა ვიყიდოო, რაზეც მოლარემ მიუთითა, რიგი დაეკავებინა, ბრალდებულმა განუმარტა, რომ მის წინ მყოფი რიგს უთმობდა, კონფლიქტი მოლარესა და ბრალდებულს შორის მოხდა. არასრულწლოვანი იქვე იდგა, უთხრა, რომ იქ სხვებიც იდგნენ და დროულად ემოქმედა. ბრალდებული არასრულწლოვანს მიუბრუნდა, შენ ვინ გეკითხებაო. როგორც ის აცხადებს, არასრულწლოვანმა შეურაცხყოფა მიაყენა, ბავშვი ამბობს, რომ ეს ასე არ იყო. ბრალდებული გარეთ გავიდა, ტაქსი გამოიძახა, ამ დროს არასრულწლოვანიც გამოვიდა, მერე კიდევ გაგრძელდა კონფლიქტი.
რაც შეეხება გირაოს, მუხლი ნაკლებად მძიმე კატეგორიის არის, მაგრამ პირველი, რაზეც ყურადღებას ვამახვილებთ, არის ის, რომ არის მარტოხელა დედა და 4 წლის შვილს მარტო ზრდის. ბავშვის ერთადერთი პატრონი არის ის, რასაც ვითვალისწინებთ.
ასევე ვითვალისწინებთ, რომ ის წარსულში არ არის ნასამართლევი, ასევე აღიარებს, ბოდიშს იხდის და მზად არის, პირადადაც მოიხადოს ბოდიში, აანაზღაუროს მორალური, მატერიალური ზიანი, რაც არის. ის ყველაფერზე თანახმაა, რომ არასრულწლოვანს მაქსიმალურად შეუმსუბუქოს მდგომარეობა. ექსპერტიზა დანიშნულია, ჯერ არ მიგვიღია დასკვნა. მკვეთრი დაზიანება, გამოხატული არ არის. არასრულწლოვანი დედამ თავის დაზღვევის მიზნით, იაშვილის კლინიკაში გადაიყვანა, ვინაიდან სახე ჰქონდა გაწითლებული და კისრის არეში ნაკაწრი ჰქონდა. ოჯახს სურს, კანონის სიმკაცრით დაისაჯოს ბრალდებული",- განაცხადა ნოზაძემ.
ცნობისთვის, ხატია ვიბლიანს პროკურატურამ წინასწარი შეცნობით არასრულწლოვანის მიმართ განხორციელებულ ძალადობის ფაქტზე წარუდგინა ბრალდება.
გამოძიების ინფორმაციით, მიმდინარე წლის 11 სექტემბერს, თბილისში, ერთ-ერთ მაღაზიაში ბრალდებულმა ვიბლიანმა ფიზიკური შეურაცხყოფა მიაყენა არასრულწლოვანს, შემდეგ კი მაღაზიის მიმდებარედ გააგრძელა მასზე ფიზიკური ძალადობა.
