რა ქონებას ფლობენ მერობის ოპოზიციონერი კანდიდატები

მიუხედავად იმისა, რომ ადგილობრივი თვითმმართველობის არჩევნებს ოპოზიციის ნაწილი ბოიკოტს უცხადებს, დედაქალაქის ამჟამინდელ მერს, კახა კალაძეს ორი ოპოზიციონერი კონკურენტი ჰყავს. თბილისი მერის არჩევნებში მონაწილეობას იღებენ ლელოს და გახარიას პარტიის კანდიდატი ირაკლი კუპრაძე და “გირჩიდან” იაგო ხვიჩია.

“ბიზნესპრესნიუსი” დედაქალქის მოქმედი მერის ქონებრივ მდგომარეობაზე უკვე წერდა, ახლა კი ოპოზიციონერი კანდიდატების დეკლარაციებს შემოგთავაზებთ.

რა ქონებას ფლობენ იაგო ხვიჩია და ირაკლი კუპრაძე:

“ძლიერი საქართველო - ლელო, ხალხისთვის, თავისუფლებისთვის” გენერალურმა მდივანმა ირაკლი კუპრაძემ ქონებრივი დეკლარაცია მიმდინარე წლის იანვარში შეავსო. დოკუმენტის მიხედვით, მის საკუთრებაშია საცხოვრებელი სახლი თბილისში, რომელიც 2023 წელს 161 886 ლარად შეიძინა. ასევე, 2 მსუბუქი ავტომობილი, კერძოდ, ford fusion, რაშიც 2022 წელს 4000 დოლარი აქვს გადახდილი და mitsubishi outlander, რომელიც 2024 წელს 5000 დოლარად იყიდა.

დეკლარაციის მიხედვით, დოკუმენტის შევსებისას ირაკლი კუპრაძეს საბანკო ანგარიშებზე ჯამში 263 ლარამდე ჰქონდა.

რაც შეეხება მის შემოსავალს, “ძლიერი საქართველო - ლელო, ხალხისთვის, თავისუფლებისთვის” გენერალური მდივნის პოზიციაზე გასულ წელს ხელფასის სახით ჯამში 31 937 ლარი მიიღო. ამასთან, ირაკლი კუპრაძე რეგისტრირებულია როგორც ინდივიდუალური მეწარმე, თუმცა დეკლარაციის მიხედვით, შემოსავალი არ უფიქსირდება.

გარდა ამისა, დოკუმენტში აღნიშნულია, რომ ირაკლი კუპრაძეს აქვს საბანკო სესხი 256 000 ლარის ოდენობით, ხოლო შემოწირულობის სახით გაცემული აქვს ჯამში 45 500 ლარი.

“გირჩის” მერობის კანდიდატმა იაგო ხვიჩიამ ქონებრივი დეკლარაცია მიმდინარე წლის თებერვალში შეავსო. დოკუმენტის მიხედვით, მის საკუთრებაშია 2 ბინა თბილისში, რომელთაგან ერთზე მითითებულია, რომ ფლობს მხოლოდ 50%-ს, ხოლო მეორე 72 000 აშშ დოლარად შეიძინა.

ასევე, მის სახელზეა 2500 კვ.მ მიწის ნაკვეთი მარტვილში, რომელიც მემკვიდრეობით გადაეცა და მსუბუქი ავტომობილი Mercedes e class, რაშიც 8500 აშშ დოლარი გადაიხადა.

ამასთან, დეკლარაციის მიხედვით, დოკუმენტის შევსების მომენტში იაგო ხვიჩია საბანკო ანგარიშებზე ფლობდა 500 ლარს, ხოლო 2024 წელს პარლამენტის წევრის სტატუსით, ხელფასის სახით აღებული აქვს ჯამში - 49 247 ლარი.

შეგახსენებთ, რომ ადგილობრივი თვითმმართველობის არჩევნები 4 ოქტომბერს გაიმართება.