"თრიალეთის" მხარდამჭერთა აქციის რეზოლუცია - თავისუფალი მედიის, სამართლიანობისა და კანონის წინაშე თანასწორობის შესახებ.

1 საათის წინ

კატეგორიები: RSS პოლიტიკა საზოგადოება რეგიონი ტელეკომპანია თრიალეთის განცხადებები

პოსტი ნახა: 24

"ერთი წელი ხელისუფლების ზეწოლის ქვეშ" -

"თრიალეთის" მხარდამჭერთა აქციის რეზოლუცია,

თავისუფალი მედიის, სამართლიანობისა და კანონის წინაშე თანასწორობის შესახებ.

30 ივნისი, 2026 წელი

ქალაქი გორი

🔴 ჩვენ, 2026 წლის 30 ივნისს, ქალაქ გორში მშვიდობიანად შეკრებილი მოქალაქეები, ჟურნალისტები, სამოქალაქო საზოგადოების წარმომადგენლები და ტელე-რადიო კომპანია "თრიალეთის" მხარდამჭერები, ვაცხადებთ:

თავისუფალი და დამოუკიდებელი მედიის არსებობა დემოკრატიული სახელმწიფოს ერთ-ერთი მთავარი საფუძველია. საზოგადოებას აქვს უფლება, მიიღოს ობიექტური, მრავალფეროვანი და დამოუკიდებელი ინფორმაცია, ხოლო მედიას აქვს უფლება, თავისუფლად და თანაბარ პირობებში განახორციელოს თავისი საქმიანობა.

დღეს შესრულდა ერთი წელი მას შემდეგ, რაც, ტელე-რადიო კომპანია "თრიალეთი" სახელმწიფოს სხვადასხვა ინსტიტუტის გადაწყვეტილებებისა და მოქმედებების ფონზე, ფინანსური, ადმინისტრაციული და სამართლებრივი ზეწოლის პირობებში საქმიანობს.

ამ ერთი წლის განმავლობაში "თრიალეთმა" არაერთხელ მიმართა საქართველოს პრემიერ-მინისტრს, პარლამენტს, სახალხო დამცველს, სასამართლოს, საჯარო რეესტრს, ფინანსთა სამინისტროს, შემოსავლების სამსახურსა და სხვა სახელმწიფო უწყებებს. ინფორმაცია ასევე მიეწოდა საქართველოში აკრედიტებულ დიპლომატიურ მისიებსა და საერთაშორისო ორგანიზაციებს.

მიუხედავად ამისა, დღემდე არ მომხდარა წარმოდგენილი პრობლემების გადაწყვეტა.

ჩვენ მიგვაჩნია, რომ არც ერთი მედიასაშუალება არ უნდა გახდეს შერჩევითი, არათანაბარი მოპყრობის ობიექტი, ხოლო სახელმწიფო ინსტიტუტები ვალდებულნი არიან, იმოქმედონ კანონის, თანასწორობისა და სამართლიანობის პრინციპების შესაბამისად.

ჩვენ არ ვითხოვთ განსაკუთრებულ პირობებს.

ჩვენ არ ვითხოვთ პრივილეგიას.

ჩვენ ვითხოვთ მხოლოდ კანონის წინაშე თანასწორობას, სამართლიანობას და დამოუკიდებელი მედიის თავისუფლად საქმიანობის შესაძლებლობას.

ამასთან დაკავშირებით, მოვითხოვთ:

1. შეწყდეს ტელე-რადიო კომპანია "თრიალეთის" მიმართ ნებისმიერი ფორმის შერჩევითი, დისკრიმინაციული და არათანაბარი მოპყრობა.

2. საქართველოს ხელისუფლებამ უზრუნველყოს კანონის წინაშე თანასწორობის პრინციპის რეალური დაცვა და ყველა მედიასაშუალების მიმართ ერთნაირი სამართლებრივი სტანდარტების გამოყენება.

3. საქართველოს პრემიერ-მინისტრმა და შესაბამისმა სახელმწიფო უწყებებმა განიხილონ "თრიალეთის" მიერ წარდგენილი ფაქტები, სამართლებრივი არგუმენტები და მოთხოვნები და უზრუნველყონ მათი სამართლიანი შეფასება.

4. ყველა სახელმწიფო ინსტიტუტმა დროულად, ეფექტიანად და გამჭვირვალედ განიხილოს "თრიალეთის" მიერ წარდგენილი განცხადებები, საჩივრები და მოთხოვნები.

5. სასამართლომ უზრუნველყოს საქმის განხილვა გონივრულ ვადაში და მიიღოს დასაბუთებული, კანონსა და არსებულ მტკიცებულებებზე დაფუძნებული გადაწყვეტილება.

6. საქართველოს ხელისუფლებამ უზრუნველყოს ისეთი სამართლებრივი და ინსტიტუციური გარემო, რომელიც დაიცავს დამოუკიდებელი რეგიონული მედიის არსებობასა და საქმიანობას.

7. მოვითხოვთ საქართველოს პრემიერ-მინისტრთან ან მის მიერ უფლებამოსილ წარმომადგენელთან ოფიციალური შეხვედრის გამართვას, რათა წარმოდგენილი იყოს "თრიალეთის" საქმესთან დაკავშირებული ყველა ფაქტობრივი და სამართლებრივი გარემოება და განხილულ იქნეს პრობლემის სამართლებრივი გადაწყვეტის გზები.

მოვუწოდებთ:

საქართველოს ხელისუფლებას, საქართველოს პარლამენტს, სასამართლო ხელისუფლებას, სახალხო დამცველს და ყველა პასუხისმგებელ სახელმწიფო ინსტიტუტს, იმოქმედონ საქართველოს კონსტიტუციის, კანონის უზენაესობისა და დემოკრატიული ღირებულებების შესაბამისად.

მოვუწოდებთ საქართველოში აკრედიტებულ დიპლომატიურ მისიებს, ევროკავშირს, ევროპის საბჭოს, ეუთოს, გაეროს, მედიის თავისუფლებისა და ადამიანის უფლებების დაცვის საერთაშორისო ორგანიზაციებს, გააგრძელონ საქართველოში მედიის თავისუფლების მდგომარეობის მონიტორინგი და ყურადღება მიაქციონ ტელე-რადიო კომპანია "თრიალეთის" საქმეს.

ჩვენ, "თრიალეთის" მხარდამჭერები, ვაცხადებთ, რომ თავისუფალი მედიის დაცვა მხოლოდ ერთი ტელეკომპანიის დაცვა არ არის.

ეს არის საქართველოს თითოეული მოქალაქის უფლების დაცვა, მიიღოს თავისუფალი, მრავალფეროვანი და დამოუკიდებელი ინფორმაცია.

ჩვენ გვჯერა, რომ სამართლიანი სახელმწიფო არ უნდა ებრძოდეს თავისუფალ მედიას.

ჩვენ გვჯერა, რომ კანონი ყველასთვის თანაბრად უნდა მოქმედებდეს.

ჩვენ გვჯერა, რომ თავისუფალი მედია არის დემოკრატიის აუცილებელი საფუძველი.

ჩვენ მოვუწოდებთ საქართველოს მოქალაქეებს, სამოქალაქო საზოგადოებასა და ყველა ადამიანს, ვისთვისაც მნიშვნელოვანია თავისუფლება, სამართლიანობა და დემოკრატია, გამოხატონ სოლიდარობა დამოუკიდებელი მედიის მიმართ.

ჩვენ გავაგრძელებთ ჩვენი კონსტიტუციური უფლებების დაცვას მხოლოდ მშვიდობიანი, სამართლებრივი და დემოკრატიული გზებით.

დღეს ჩვენ მხარს ვუჭერთ "თრიალეთს", მაგრამ ამავე დროს ვიცავთ საქართველოს უფლებას, ქვეყანაში არსებობდეს თავისუფალი და დამოუკიდებელი მედია.