სამოქალაქო ავიაციის სააგენტომ ავიაკომპანია „ვიზეარს“ ახალი მიმართულებით რეგულარული რეისების შესრულებისათვის აუცილებელი ნებართვა მიანიჭა. შედეგად, საქართველო იტალიის ქალაქ ვენეციას საჰაერო გზით დაუკავშირდება.
ვენეცია-ქუთაისი-ვენეციის საჰაერო ხაზზე ავიაკომპანია ფრენებს ზამთრის სანავიგაციო სეზონიდან შეასრულებს. სააგენტოში წარმოდგენილი განაცხადის შესაბამისად, „ვიზეარი“ ვენეციიდან ქუთაისის მიმართულებით ოპერირებას მიმდინარე წლის 2 დეკემბრიდან, კვირაში ორი სიხშირით, ყოველ სამშაბათსა და შაბათს განახორციელებს.
დღეის მდგომარეობით, დაბალბიუჯეტური ავიაკომპანია „ვიზეარი“ საქართველოდან 23 მიმართულებით, კვირაში დაახლოებით 72 სიხშირით ოპერირებს. მიმდინარე წლის ცხრა თვის მდგომარეობით, ავიაკომპანიამ 1 075 585 მგზავრი გადაიყვანა და ამ მონაცემებით საავიაციო ბაზრის ლიდერია.
