„სასამართლომ, სრულად გაიზიარა ბრალდების მხარის პოზიცია, რომ ბრალდებულთა მხრიდან არსებობდა მტკიცებულებების განადგურების, ახალი დანაშაულის ჩადენისა და მიმალვის საფრთხე და გამოყენებულ იქნა ყველაზე მკაცრი აღკვეთის ღონისძიება - პატიმრობა. დაცვის მხარე აპელირებდა იმაზე, რომ ბრალდების მხარის მიერ წარმოდგენილი მტკიცებულებებში არ იყო დადასტურებული ბრალდებულების მიერ ჩადენილი დანაშაული.
ბორის გოგიჩაიშვილსა და გიორგი კანდელაკს შორის იყო მიმოწერა, რომელიც უშუალოდ შეეხებოდა მათ მიერ ჩადენილ დანაშაულს, რომ ისინი უაქციზო ალკოჰოლური სასმელების წარმოებას ახორციელებდნენ. ბრალდებულები ერთმანეთს წარმოების ამსახველ ვიდეოჩანაწერებს უგზავნიდნენ, ასევე თუ რამდენი ბოთლი იქნა დამზადებული და ასევე, მითითებულ იყო თუ რა დრო დასჭირდებოდა გარკვეული რაოდენობის უაქციზო ალკოჰოლური სასმლის დამზადებას.
რეალიზების ნაწილთან დაკავშირებით მიმდინარეობს გამოძიება, თუ დადასტურდება მათი მხრიდან რეალიზაცია, მოხდება ბრალის დაზუსტება.
საგამოძიებო მოქმედებების ჩატარების შემდგომ ამოღებულ იქნა ყველა ის ნივთმტკიცება, რომელიც ბრალდების მხარემ და საგამოძიებო ორგანომ მიიჩნია, რომ დაკავშირებული იყო დანაშაულთან. ყველა ნივთმტკიცება გადმოტანილია საგამოძიებო ორგანოებში და ნაწილის ადგილზე დალუქვა მოხდა“,- განაცხადა გიორგი ჯავარაშვილმა.
