თსუ-სა და სტუ-ს გაერთიანება არის სპეციალური ღონისძიება მიმართული იმისკენ, რომ მოხდეს ივანიშვილის მიერ დაფუძნებული ქუთაისის უნივერსიტეტის გადარჩენა, - ამის შესახებ პარტია “გახარია საქართველოსთვის” დეპუტატმა, გიგა ფარულავამ ჟურნალისტებთან განათლების რეფორმაზე საუბრისას განაცხადა.
მისი თქმით, განათლების რეფორმის დაჩქარებული წესით განხილვა და მიღება აბსურდია.
„იმდენად ტრაგიკულ მდგომარეობაში ვართ, არც სასაცილოა, არც სატირალი - განათლების რეფორმას ხელისუფლება ატარებს დაჩქარებული წესით, ამაზე მეტი აბსურდი რა უნდა იყოს? გუშინ შემოიტანეს, დღეს კი დაჩქარებული წესით უნდა მიიღონ და დამტკიცდეს. ვამბობთ: წარმოადგინეთ კვლევები, რას ემყარება, ვინ ჩაატარე ეს კონკრეტული კვლევა, რომლის საფუძველზეც განათლების რეფორმის დაჩქარებული წესით მიღება ხდება. ეს კვლევები ჩვენ არ გვინახავს… რაც შეეხება თსუ-სა და სტუ-ს გაერთიანებას, ეს არის სპეციალური ღონისძიება იმისკენ მიმართული, რომ მოხდეს ივანიშვილის მიერ დაფუძნებული ქუთაისის უნივერსიტეტის გადარჩენა. ამ საკითხებს განათლების რეფორმასთან სხვა კავშირი არ აქვს”, - განაცხადა გიგა ფარულავამ.
