ბელგრადი: მოხუცთა თავშესაფარში გაჩენილ ხანძარს რვა ადამიანის სიცოცხლე ემსხვერპლა
ორშაბათს, დილით, სერბეთის დედაქალაქ ბელგრადის გარეუბანში მდებარე მოხუცთა თავშესაფარში ხანძარი გაჩნდა, რომლის შედეგად რვა ადამიანი დაიღუპა და შვიდი დაშავდა. პოლიციის ოფიცირი ლუკა კაუშიჩი, რომელიც ხანძრის ჩაქრობის პროცესს მეთვალყურეობდა, ამბობს, რომ დილის 3:30 საათზე (02:30 GMT), როდესაც ხანძარი გაჩნდა, თავშესაფარში დაახლოებით 30 ადამიანი იმყოფებოდა. კაუშიჩის თქმით, თავდაპირველი ვერსიით, ხანძარი, შესაძლოა, ერთ-ერთმა მცხოვრებმა გააჩინა. „არსებობს ეჭვი, რომ ხანძარი ერთ-ერთი მოსახლის მიზეზით გაჩნდა, მაგრამ ყველა დეტალი გამოძიებამ უნდა დაადგინოს“, - განუცხადა კაუშიჩმა სააგენტო „ფრანს პრესს“.
სააგენტოს რეპორტიორის ცნობით, ხანძრის შემდეგ, როდესაც სახანძრო ბრიგადებმა და მაშველებმა ტერიტორია დაასუფთავეს, გაირკვა, რომ ობიექტის სახურავის უმეტესი ნაწილი დაიწვა. მოგვიანებით, სერბეთის ოფიციალურმა პირებმა ადგილობრივი სახანძრო ბრიგადების სწრაფი რეაგირება შეაქეს, რადგან, მიუხედავად იმისა, რომ მოხუცებულთა თავშესაფარი საკმაოდ შორეულ რაიონში მდებარეობს, ისინი შემთხვევის ადგილზე მალევე მივიდნენ. „სამწუხაროდ, ხანძრის შედეგად რვა ადამიანი დაიღუპა. უნდა ითქვას, რომ სწრაფი რეაგირების სამსახურის თანამშრომლებმა გამოწვევას ძალიან სწრაფად და წარმატებით უპასუხეს. მათ 13 ადამიანის ევაკუაცია მოახდინეს“, - განუცხადა ადგილობრივ მედიას შრომის მინისტრმა, ნემანია სტაროვიჩმა. მანამდე მაშველები ამბობდნენ, რომ, სულ მცირე, ექვსი ადამიანი დაიღუპა.
„მინდა ღრმა თანაგრძნობა გამოვუცხადო დაღუპულთა ოჯახებს“, - განაცხადა სტაროვიჩმა და აღნიშნა, რომ გამოძიება დაწყებულია. „მჯერა, რომ პროკურატურა ოფიციალურ ინფორმაციას საზოგადოებას ძალიან მალე, დღის განმავლობაში მიაწვდის“, - დასძინა მან. დაშავებულები სერბეთის დედაქალაქის საავადმყოფოებში არიან გადაყვანილნი.
