რეჟიმს, რომელიც იღებს რუსული ყაიდის კანონებს, ციხეში ჰყავს სინდისის პატიმრები, უარს ამბობს ევროინტეგრაციაზე, მტრად აცხადებს სრულიად ევროპას და ამერიკის შეერთებულ შტატებს, რა ესაქმება ევროპის დღეზე?! - მოსასვლელი არ აქვთ, ხალხში ვერ დადიან!, - ამის შესახებ "სტრატეგია აღმაშენებლის" ლიდერმა, გიორგი ვაშაძემ განაცხადა, რითაც შეაფასა ფაქტი, რომ საქართველოს მთავრობა ევროკავშირის საელჩოს მიერ ორგანიზებულ ევროპის დღისადმი მიძღვნილ ღონისძიებაზე არ მივიდა.
მისი თქმით, ღონისძიებაზე დასასწრები მოსაწვევი პირადად არც მას მიუღია.
„რეჟიმს, რომელიც იღებს რუსული ყაიდის კანონებს, ციხეში ჰყავს სინდისის პატიმრები, უარს ამბობს ევროინტეგრაციაზე, მტრად აცხადებს სრულიად ევროპას და ამერიკის შეერთებულ შტატებს, რა ესაქმება ევროპის დღეზე?! მე მოსაწვევი კი არ მივიღე, ავდექი და მოვედი. რად მინდა ევროპის დღეზე მოსაწვევი, ხალხო?! ევროპის დღე ჩემია, მოსაწვევი რაში მჭირდება?! ავდექი და მოვედი, არაფერი მოსაწვევი არ მიმიღია. რატომ თვითონ ვერ მოვიდნენ?! იმიტომ რომ მოსასვლელი არ აქვთ, ხალხში ვერ დადიან, აქ რომ გამოიარონ ახლა ევროპის დღეზე საოცრება დაემართებათ. მარტო შეუძლიათ შენობებში გამოიკეტონ პოლიციის ალყის უკან. ეგ არის და ეგ“, - განაცხადა ვაშაძემ.
ცნობისთვის, პრემიერ-მინისტრმა, ირაკლი კობახიძემ განაცხადა, რომ ევროკავშირის საელჩომ პროტოკოლი დაარღვია და მთავრობას ღონისძიებაზე დასასწრები მოსაწვევი არ გაუგზავნა. ამის გამო, კობახიძემ საელჩო საბჭოურ მიდგომაში დაადანაშაულა.
