გრიგოლ გეგელია - მივესალმებით იმას, რომ ეუთო/ოდირის დამკვირვებლები როგორც ჩანს, საქართველოში იქნებიან წარმოდგენილი

„არჩევნებზე საერთაშორისო დამკვირვებლების არსებობა ძალიან მნიშვნელოვანია. ჩვენ ბუნებრივია, ამ არჩევნებს ვეძახდით ე.წ. არჩევნებს, დე-ფაქტო არჩევნებს და კვლავაც ასე ვუწოდებთ, რადგან ჩვენთვის ცხადია, რომ საქართველოში არჩევნების იდეა და პრაქტიკა დასუსტებული, დაზიანებულია. არჩევნების პროცესისადმი სამწუხაროდ, ძალიან დაბალი საზოგადოებრივი ნდობაა და ამაზე პასუხისმგებლობა რასაკვირველია, „ქართული ოცნების“ რეჟიმს ეკისრება. ამავდროულად, ჩვენ მივიჩნევთ, რომ ყველა ინსტრუმენტი უნდა გამოვიყენოთ ბრძოლის და მივესალმებით იმას, რომ ეუთო/ოდირის შესაბამისი დამკვირვებლები როგორც ჩანს, საქართველოში იქნებიან წარმოდგენილი. ეს არის მნიშვნელოვანი რამ, ამაზე ვმუშაობდით ჩვენც, თუმცა, ეს არის ისეთი საკითხი, რომელსაც სჭირდება დე-ფაქტო ხელისუფლებისგან წერილი, ამიტომაც ჩვენი მუშაობა არ იყო და ვერ იქნებოდა საკმარისი ამ კუთხით, თუმცა, ეუთო/ოდირმა და ყველა სხვა მისიამ იცის, რომ ჩვენ გვსურდა, ისინი აქ ყოფილიყვნენ. მივესალმებით მათ ჩამოსვლას და რა თქმა უნდა, ვიქნებით სრულ კოორდინაციაში ყველა იმ მისიასთან, რომელიც აქ იქნება“, - განაცხადა გეგელიამ.