ინდოეთში, ქვეყნის უდიდეს რელიგიურ ფესტივალზე მასობრივი ჭყლეტის შედეგად დაღუპულთა რიცხვი 35-მდე გაიზარდა და შესაძლოა, დაღუპულთა რაოდენობა კიდევ გაიზარდოს. ამასთან, დაშავებულია 90-ზე მეტი ადამიანი.
მედიის ინფორმაციით, მომლოცველთა დიდმა ჯგუფმა პოლიციის ბარიერების გადალახვა სცადა წმინდა ადგილას მისასვლელად, სადაც განბანვის ცერემონია მიმდინარეობდა, შემდეგ კი, ადამიანთა ნაკადმა მდინარის ნაპირას მძინარე ადამიანებს გადაუარა.
ინდოეთის პრემიერ-მინისტრმა, ნარენდრა მოდიმ მომხდარის შესახებ მწუხარება გამოთქვა.
„გულწრფელ მწუხარებას გამოვხატავ დაზარალებული ოჯახების მიმართ და ვლოცულობ დაშავებულთა სწრაფი გამოჯანმრთელებისთვის“, – აღნიშნა მოდიმ.
ინდოეთის პრემიერ-მინისტრის თქმით, მუდმივ კონტაქტშია უტარ-პრადეშის შტატის მთავრობასთან.
როგორც მედია წერს, ფესტივალზე 100 მილიონამდე მომლოცველს ელოდნენ. დილის 10:00 საათისთვის უკვე 36 მილიონზე მეტმა ადამიანმა მიიღო მონაწილეობა წმინდა განბანვის რიტუალში. მომხდარის გამო დღის მთავარი ცერემონია გადაიდო. ფაქტზე დაწყებულია გამოძიება.
