პარლამენტის დროებითი საგამოძიებო კომისიის მოთხოვნის შეუსრულებლობის ფაქტზე 23 ივნისს, თბილისის საქალაქო სასამართლოში განაჩენი სამი ოპოზიციონერი პოლიტიკოსის, ზურაბ გირჩი ჯაფარიძის, მამუკა ხაზარაძისა და ბადრი ჯაფარიძის საქმეებზე გამოცხადდება.
როგორც ცნობილია, არცერთი მათგანი მათ მიმართ განაჩენის გამოცხადებას არ დაესწრება.
პირველი განაჩენი დადგება „კოალიცია ცვლილებისთვის“ ერთ-ერთი ლიდერის, ზურაბ გირჩი ჯაფარიძის მიმართ. მისი სხდომა 10:30 საათზეა დანიშნული. მოსამართლე ჯვებე ნაჭყებიამ გასული სხდომა სწორედ ბრალდებულის საბოლოო სიტყვის ეტაპზე გადადო, თუმცა, პოლიტიკოსის პოზიცია ცნობილია, ის სასამართლოს და მოსამართლეს უნდობლობას უცხადებს, რის გამოც სხდომაზე არ გამოცხადდება და არც მისთვის მინიჭებული საბოლოო სიტყვის უფლებით ისარგებლებს.
„ლელო-ძლიერი საქართველოს“ ლიდერის, მამუკა ხაზარაძის საქმეზე განაჩენი 15:00 საათზე, მისივე თანაგუნდელის, ბადრი ჯაფარიძის საქმეზე კი 17:00 საათზე გამოცხადდება. აქაც მოსამართლე ზვიად შარაძემ სხდომა ბრალდებულების საბოლოო სიტყვის ეტაპზე გადადო. თუმცა, მათი პოზიციაც ცნობილია, ისინი არც საბოლოო სიტყვას იტყვიან და არც სხდომაზე მისვლას აპირებენ.
ცნობისთვის, საქართველოს პარლამენტის დროებით საგამოძიებო კომისიაზე ახსნა-განმარტების მისაცემად სულ ცხრა ოპოზიციონერი პოლიტიკოსი დაიბარეს, მათგან საკანონმდებლო ორგანოში მისვლაზე უარი რვა პირმა განაცხადა, გამონაკლისი მხოლოდ ყოფილი შს მინისტრი გიორგი გახარიაა, შესაბამისად, მას ამ საქმეზე ბრალდება წარდგენილი არ აქვს. რაც შეეხება დანარჩენ პოლიტიკოსებს, მათ აღნიშნულთან დაკავშირებით ბრალი სისხლის სამართლის კოდექსის 349-ე მუხლით წარუდგინეს, რაც „საქართველოს პარლამენტის დროებითი საგამოძიებო კომისიის მოთხოვნის შეუსრულებლობას“ გულისხმობს, აღნიშნული ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.
ზურაბ გირჩი ჯაფარიძეს აღკვეთის ღონისძიების სახით 20 000-ლარიანი გირაო შეეფარდა, რაც მან კანონით დადგენილ ვადაში არ გადაიხადა, რის გამო, ის 22 ივნისს, სხდომათა დარბაზში დააკავეს.
მამუკა ხაზარაძეს და ბადრი ჯაფარიძეს კი, აღკვეთის ღონისძიების სახით 50 000-50 000-ლარიანი გირაო აქვთ შეფარდებული, რაც მათ კანონით დადგენილ ვადაში გადაიხადეს.
განაჩენი გამოსაცხადებელი დარჩება ხუთი პოლიტიკოსის - გიორგი ვაშაძის, ნიკა მელიას, ნიკა გვარამიას, გივი თარგამაძისა და ირაკლი ოქრუაშვილის მიმართ.
ვაშაძეს განაჩენს 24 ივნისს, 10:00 საათზე მოსამართლე ნინო გალუსტაშვილი დაუყენებს.
