ქუთაისში გოგონათა და ჭაბუკთა შორის ჭადრაკში სხვადასხვა ასაკობრივ კატეგორიაში საქართველოს ჩემპიონატი მიმდინარეობს

ქუთაისში, მაია ჩიბურდანიძის სახელობის საჭადრაკო სკოლაში, საქართველოს ჭადრაკის ფედერაციის ორგანიზებით მიმდინარეობს საქართველოს ჩემპიონატი გოგონათა და ჭაბუკთა შორის შემდეგ ასაკობრივ კატეგორიებში: U9, U11, U13, U15.

ამის შესახებ ინფორმაციას ჭადრაკის ფედერაცია ავრცელებს.

მათივე ცნობით, ასპარეზობა შვეიცარიული სისტემით 9 ტურად ტარდება და მასში ქვეყნის თითქმის ყველა რეგიონის 300-მდე მოჭადრაკე მონაწილეობს.

„I-II ადგილზე გასული მოჭადრაკეები ევროპის და მსოფლიოს სასკოლო ჩემპიონატების საგზურით ადგილის შესაბამისად დაჯილდოვდებიან.

7 ტურის შემდეგ ქულათა მაქსიმუმით, ყველა გამარჯვებით მხოლოდ ორი მონაწილე ლიდერობს: ევროპის ჩემპიონატის პრიზიორი ლილე სვანაძე და ერეკლე ტაბატაძე.

ფინიშამდე ორი ტურით ადრე ჩემპიონატის ლიდერთა შორის არიან:

9 წლამდე გოგონები: ლილე სვანაძე (ქუთაისი;მწვრთნელი ხათუნა გუბელაძე) – 7 ქულა!

9 წლამდე ჭაბუკები: ანდრია ყუბანეიშვილი (ქუთაისი; მწვრთნელი რამაზ ერაძე); ალექსანდრე ბერიშვილი (თბილისი; მწვრთნელი მაია ლომინეიშვილი) – 6 ქულა;

11 წლამდე გოგონები: მართა დოგრაშვილი (ქუთაისი; მწვრთნელი გიორგი ტყეშელაშვილი); მარიამ რეხვიაშვილი (თბილისი; მწვრთნელი იოსებ კვირიაშვილი) – 6 ქულა;

11 წლამდე ჭაბუკები: ლაზარე ჩხარტიშვილი (ოზურგეთი; მწვრთნელი დავით მაღალაშვილი) – 6,5 ქულა;

13 წლამდე გოგონები: ნინო ლიპარტია (ფოთი; მწვრთნელი გოჩა ჩაჩუა) – 5,5 ქულა;

13 წლამდე ჭაბუკები: გაბრიელ გაბადაძე (ქუთაისი; მწვრთნელი ხვიჩა სუპატაშვილი) – 6 ქულა;

15 წლამდე გოგონები: ბარბარე აშოთია (ქუთაისი; მწვრთნელი დავით ჯოჯუა) – 6,5 ქულა;

15 წლამდე ჭაბუკები: ერეკლე ტაბატაძე (თბილისი; მწვრთნელი ზურაბ სტურუა) – 7 ქულა!

ჩემპიონატის მთავარი ორგანიზატორი და ტურნირის დირექტორი, ალექსანდრე არსენიძე გახლავთ, ხოლო მთავარი მსაჯი, საერთაშორისო კატეგორიის არბიტრი, ინგა არსენიძე“, - ნათქვამია ინფორმაციაში.