ივნისის თვეს სხვაგვარად ქალღმერთ იუნონას თვედაც მოიხსენიებენ. იუნონა რომაულ მითოლოგიაში ქორწინების, დედობისა და ზოგადად ქალური საწყისის მფარველ ღვთაებად ითვლებოდა. მისი პროტოტიპი ბერძნულ მითოლოგიაშიც გვხვდება ქალღმერთი ჰერას სახით. ასტროლოგიურად კი იუნონა პარტნიორულ ურთიერთობებს განაგებს. მისი ტრანზიტები მიანიშნებს ქორწინების, განქორწინების ალბათობას ან ოჯახური სიტუაციის მოსალოდნელ ცვლილებებს. იუნონას მფარველობაში მყოფი ივნისის თვე კი, ორ საკმაოდ განსხვავებულ ზოდიაქოს ნიშანს აერთიანებს. მოუსვენარ, კომუნიკაბელურ, ცნობისმოყვარე და ცოტა არ იყოს ზედაპირულ ტყუპს და ფრთხილ, ბუტია, უზომოდ სენსიტიურ კირჩხიბს.
- როგორია 29 ივნისს დაბადებული ადამიანი
29 ივნისს დაბადებული ადამიანები, როგორც წესი, თანაგრძნობის უსაზღვრო ნიჭითა და მეგობრულობით გამოირჩევიან. მათ აქვთ უნარი დაეხმარონ სხვებს და გარშემო მყოფები საკუთარი ოცნებების ასრულებისკენ წააქეზონ. ისინი დაუღალავად ეხმარებიან მეგობრებს და ხშირად იმითაც ბედნიერად გრძნობენ თავს, რომ ვიღაცის ჩანაფიქრს შეასხეს ფრთები და ამაში თავადაც მიუძღვით დიდი წვლილი.
