გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, ბრაკონიერობასთან ბრძოლის ფარგლებში, ელექტროშოკური მოწყობილობით უკანონო თევზჭერის 4 ფაქტი გამოავლინეს.
ამის შესახებ ინფორმაციას გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტი ავრცელებს.
მათი ცნობით, სამართალდარღვევები აღკვეთილია რაჭა-ლეჩხუმი-ქვემო სვანეთში, გურიაში, შიდა ქართლსა და ქვემო ქართლში.
„ამბროლაურის მუნიციპალიტეტის სოფელ ქვიშარში მოქალაქე მდინარე რიონზე ელექტროშოკური მოწყობილობისა და ჩოგანბადეების საშუალებით თევზს იჭერდა და სხვადასხვა სახეობის 3კგ თევზი ჰქონდა მოპოვებული.
უკანონო თევზჭერისას იგივე აკრძალულ საშუალებას იყენებდა მოქალაქე ოზურგეთის მუნიციპალიტეტის სოფელ დვაბზუს მიმდებარედ, მდინარე ნატანებზე.
გორის მუნიციპალიტეტის სოფელ ხიდისთავის მიმდებარედ, მდინარე მტკვარზე, მოქალაქე ელექტროშოკური მოწყობილობით გასაბერი ნავიდან უკანონოდ იჭერდა თევზს. სამართალდამრღვევს უკანონოდ ჰქონდა მოპოვებული ხრამულის სახეობის 8 კგ. თევზი.
ასევე 8 კილოგრამი სხვადასხვა სახეობის თევზი მოიპოვა ელექტროშოკური მოწყობილობის გამოყენებით მოქალაქემ მარნეულის მუნიციპალიტეტ სოფელ ლეჟბადინის მიმდებარედ, მდინარე ხრამის კალაპოტიდან. ბრაკონიერი არ დაემორჩილა ქვემო ქართლის რეგიონული სამმართველოს თანამშრომლებს, ფიზიკური შეურაცხყოფა მიაყენა და მიიმალა. სამართალდამრღვევი შსს მარნეულის სამმართველოს თანამშრომლებმა გარემოსდაცვითი ზედამხედველობის დეპარტამენტის თანამშრომლის ფიზიკური შეურაცხყოფისა და დაუმორჩილებლობისთვის დააკავეს.
ვინაიდან ოთხივე ფაქტი სისხლის სამართლის დანაშაულის ნიშნებს შეიცავს, მასალები, შემდგომი რეაგირების მიზნით, შესაბამის უწყებებში გადაიგზავნა“, - ნათქვამია გავრცელებულ ინფორმაციაში.
