ფასების სტაბილურობის შენარჩუნება ჩვენი მთავარი ამოსავალი წერტილია და საზოგადოებამ იცის, რომ როგორც კი ფასების სტაბილურობის განმტკიცებისთვის აუცილებელი ხდება ეროვნული ბანკის მყისიერი რეაგირება, ამას ყოველთვის ვაკეთებთ, - ამის შესახებ ეროვნული ბანკის პრეზიდენტის მოვალეობის შემსრულებელმა ნათია თურნავამ მონეტარული პოლიტიკის კომიტეტის სხდომის შემდეგ გამართულ ბრიფინგზე განაცხადა.
მისი თქმით, საქართველოს ეკონომიკა ვითარდება სტაბილურად და დაბალანსებულად. სახეზეა ძლიერი მაღალი ეკონომიკური ზრდისა და დაბალი ინფლაციის ძალიან კარგი თანაფარდობა.
„ამ ეტაპზე გვაქვს სტაბილური მდგრადი განვითარების სურათი და მიგვაჩნია, რომ არსებული სტატუსკვო უნდა შევინარჩუნოთ. შესაბამისად, უცვლელად ვტოვებთ მონეტარული პოლიტიკის განაკვეთს“, - აღნიშნა ნათია თურნავამ.
მან ასევე ხაზი გაუსვა, რომ ეროვნულ ბანკს ეტაპობრივი შემსუბუქების პოლიტიკა აქვს გაცხადებული და ბოლო ერთი წლის განმავლობაში ყველაზე მაღალი ნიშნულიდან, 11 %-დან რეფინანსირების განაკვეთი ეტაპობრივად 8%-მდე შემცირდა.
„დღეის მონაცემებით, ნეიტრალური განაკვეთი არის 7%, რომლისკენაც ეტაპობრივად ვისწრაფვით. ახლა ვდგავართ 8%-ზე, თითქმის მივუახლოვდით ნეიტრალურ განაკვეთს და უფრო ნელი ბიჯებით გავაგრძელებთ ამ სვლას. ჩვენთვის ისევ და ისევ მნიშვნელოვანია, გავითვალისწინოთ გლობალური რისკები როგორც რეგიონში, ასევე მსოფლიოში. პირველ რიგში, ეს არის იმპორტული საქონლის ფასებთან არსებული გაურკვევლობა - გლობალურ ბაზრებზე ნავთობსა და სასურსათო ნედლეულზე ფასების მერყეობა, ჩინეთიდან ტრანსპორტირების ღირებულების ზრდა. ეს გაურკვევლობა საკმაოდ საყურადღებო ფაქტორია და აქედან გამომდინარე ჩვენ ვიჩენთ მეტ სიფრთხილეს“, - აღნიშნა ნათია თურნავამ და დასძინა, რომ არსებული გეოპოლიტიკური დაძაბულობის მიუხედავად, სებ-ი ფასების სტაბილურობას ინარჩუნებს.
ამასთან, მისი თქმით, ქვეყანაში არის ძლიერი ეკონომიკური ზრდა, რაც ძირითადად შიდა მოხმარებით არის განპირობებული. თავის მხრივ, მოხმარების ზრდა გაზრდილი საკრედიტო აქტივობითაა განპირობებული. კერძოდ, მისი თქმით, სესხების ზრდის ტემპი არის საკმაოდ მაღალი - 18-19%, თუმცა მდგრადი. თურნავას განცხადებით, მიუხედავად, მაღალი ეკონომიკური აქტივობისა, გაზრდილია ეკონომიკის ჯამური წარმოების პოტენციალი და მომატებულია კონკურენცია კერძო სექტორში, რაც მოთხოვნის მხრიდან ფასებზე ზეწოლას ამცირებს.
ნათია თურნავას განმარტებით, ეროვნული ბანკის პროგნოზით, სხვა თანაბარ პირობებში, 2024 წელს ინფლაცია საშუალოდ 1.9 % იქნება, ხოლო საშუალოვადიან პერიოდში ეტაპობრივად მიუახლოვდება მიზნობრივ 3%-ს.
საქართველოს ეროვნული ბანკის მონეტარული პოლიტიკის კომიტეტმა დღევანდელ სხდომაზე მონეტარული პოლიტიკის განაკვეთის უცვლელად დატოვების გადაწყვეტილება მიიღო. მონეტარული პოლიტიკის განაკვეთი 8%-ს შეადგენს.
