ადაპტოლი, ეს არის ლატვიური ფარმაცევტული კომპანია Olainfarm-ის მიერ შემუშავებული მედიკამენტი და ძირითადად ინიშნება ნევროზის, შფოთვის, სტრესის, ნერვული დაძაბულობისა და ემოციური არასტაბილურობის სიმპტომების შესამსუბუქებლად. მოგეხსენებათ, დღეისათვის აქ დასახელებული პრობლემები საკმაოდ გავრცელებულია და ბევრი ადამიანის ყოველდღიურობას წარმოადგენს — გამომდინარე დატვირთული ცხოვრების წესიდან თუ სხვადასხვა მიზეზით. შესაბამისად, მსგავსი მედიკამენტების არსებობა მნიშვნელოვნად გვეხმარება მენტალური მდგომარეობის გაუმჯობესებაში.
საგულისხმოა, რომ ადაპტოლი მიეკუთვნება ანქსიოლიტიკებს — ანუ პრეპარატებს, რომლებიც ამცირებს შფოთვასა და ნერვულ დაძაბულობას. მისი მოქმედების მექანიზმი კი დაკავშირებულია ცენტრალურ ნერვულ სისტემაზე ზემოქმედებასთან. სწორედ ასე ახერხებს ადაპტოლი ზედმეტი დაძაბულობის, შფოთვისა და სტრესის შემსუბუქებას.
ბუნებრივია, როგორც ნებისმიერი სხვა პრეპარატი, ადაპტოლიც ექიმის რეკომენდაციითა და დანიშნულებით უნდა მივიღოთ. თუმცა ზოგად ინფორმაციას სტატიაშიც გაგიზიარებთ, რათა გარკვეული წარმოდგენა გქონდეთ მის მიღებამდე.
პირველ რიგში, უნდა აღინიშნოს, რომ ადაპტოლს მიორელაქსაციის ეფექტი არ გააჩნია. სხვა სიტყვებით, ხსნის ან ამცირებს შფოთვას, შიშს, შინაგან ემოციურ დაძაბულობასა და გაღიზიანებას, თუმცა მისი დამამშვიდებელი მოქმედება არ იწვევს კუნთების მოდუნებას ან მოძრაობის კოორდინაციის დარღვევას. ამავდროულად, მიუხედავად იმისა, რომ ადაპტოლს არ გააჩნია პირდაპირი საძილე ეფექტი, იგი აძლიერებს საძილე საშუალებების მოქმედებას და დარღვევების შემთხვევაში, ძილის რეგულირებაშიც მონაწილეობს.
აქვე აღსანიშნავია, რომ ადაპტოლი ხელს უწყობს ყურადღების კონცენტრირებასა და გონებრივი შრომისუნარიანობის მატებას. თავის მხრივ, ეს ძალიან მნიშვნელოვანი დადებითი ეფექტია, ვინაიდან ემოციური დასტაბილურების პარალელურად, არა მხოლოდ არ ქვეითდება შრომისუნარიანობა, არამედ პირიქით, იმატებს კიდეც.
მიუხედავად ამისა, მაინც გასათვალისწინებელია პოტენციური გვერდითი მოვლენების არსებობა. შესაძლოა, რიგ შემთხვევებში გამოვლინდეს ისეთი ეფექტები, როგორებიცაა: თავბრუსხვევა, გულისრევა, არტერიული წნევის ცვლილებები, მუცლის ტკივილი, ალერგიული რეაქციები — გამონაყარი კანზე, ქავილი ან სხვა გამოვლინებები.
ამასთან, ადაპტოლის გამოყენება ორსულობის დროს არ არის რეკომენდებული, რადგან არ არსებობს საკმარისი მონაცემები მისი უსაფრთხოების შესახებ ამ მდგომარეობაში. ანალოგიურად ლაქტაციის დროს, ვინაიდან საკმარისი ინფორმაცია არ გვაქვს დედის რძეზე მისი პოტენციური გავლენის შესახებ.
