ჟვანიას ქუჩაზე მომხდარი დაპირისპირების მონაწილეები ამ დრომდე კლინიკაში რჩებიან. დაზარალებულ ყაზახეთის მოქალაქეს ოპერაცია გუშინვე ჩაუტარდა. მას ცეცხლსასროლი იარაღით მიყენებული ჭრილობები აღენიშნება.
სამედიცინო ჩარევა დასჭირდა სავარაუდო ეჭვმიტანილს, გურამ ელიზბარაშვილსაც, რომელიც პოლიციის განყოფილებიდან სასწრაფო დახმარებამ კლინიკაში გადაიყვანა. შემთხვევის დროს ელიზბარაშვილი ფეხის არეში თავადაც დაიჭრა.
"ყაზახი ეროვნების პიროვნებას არ მოეწონა ძაღლის ამ ტერიტორიაზე სეირნობა და მოსთხოვა ჩემს შვილს, რომ გაეყვანა ტერიტორიიდან, რაზეც შეკამათდნენ და მოხდა ის, რაც მოხდა. ჩემი შვილი დაჭრილია, ის ყაზახიც დაჭრილია და მინდა, დადგინდეს სიმართლე, რა მოხდა. ჩემი შვილი, როგორც ეჭვი მაქვს, დაჭრილია სხვა იარაღით,"- აცხადებს გურამ ელიზბარაშვილის მამა თამაზ ელიზბარაშვილი.
გამოძიება ჯანმრთელობის დაზიანებისა და იარაღის უკანონო შეძენა-შენახვა-ტარების მუხლებით მიმდინარეობს.
