ევროკავშირის ქვეყნების ელჩები შეთანხმდნენ გეგმაზე, რომლის მიხედვითაც 2028 წლისთვის რუსეთიდან ნავთობისა და გაზის იმპორტი ეტაპობრივად შეწყდება. ინფორმაციას Reuters ევროპელ დიპლომატებზე დაყრდნობით ავრცელებს.
გეგმის თანახმად, მიწოდების თანდათანობითი შეწყვეტა 2026 წლის იანვრიდან დაიწყება, როცა ახალი კონტრაქტებით რუსული გაზის იმპორტი აიკრძალება. 2026 წლის ივნისიდან შეზღუდვა, ასევე, მოკლევადიან ხელშეკრულებებზე გავრცელდება, ხოლო 2028 წლის იანვრიდან გრძელვადიანი კონტრაქტებით მიწოდების სრული აკრძალვა შევა ძალაში.
დოკუმენტის მიზანი კრემლისთვის უკრაინაში ომის დასაფინანსებლად გამოყენებული ენერგეტიკული შემოსავლის შეწყვეტაა.
სააგენტოს წყაროების ცნობით, ევროკავშირის, თითქმის, ყველა ქვეყანამ მხარი დაუჭირა ინიციატივას, რაც მისი სწრაფი დამტკიცების შანსს ზრდის. თუმცა უნგრეთმა და სლოვაკეთმა დოკუმენტი გააკრიტიკეს, რადგან მათი ეკონომიკა კვლავ რუსულ ენერგიაზე არის დამოკიდებული. ამის მიუხედავად, კანონპროექტი ამ ქვეყნებს ავალდებულებს, 2028 წლისთვის რუსეთიდან ნავთობისა და გაზის იმპორტის სრულად შესაჩერებლად ეროვნული გეგმა მოამზადონ.
ელჩებს შორის შეთანხმების შემდეგ დოკუმენტი ევროკავშირის მინისტრებს 20 ოქტომბერს დაგეგმილ შეხვედრაზე დასამტკიცებლად გადაეგზავნება. გეგმის დასამტკიცებლად „კვალიფიციური უმრავლესობის,“ანუ წევრი სახელმწიფოების, მინიმუმ, 55%-ის თანხმობა იქნება საჭირო. ამის შემდეგ ევროკავშირის ქვეყნები და ევროპარლამენტი კანონის საბოლოო ტექსტზე მოლაპარაკებებს დაიწყებენ.
ამჟამად ევროკავშირის დამოკიდებულება რუსულ გაზზე 2021 წლის 45%-იანი მაჩვენებლიდან, დაახლოებით, 12%-მდე არის შემცირებული. თუმცა რიგი ქვეყნები, მათ შორის, უნგრეთი, საფრანგეთი და ბელგია შესყიდვებს კვლავ განაგრძობენ.
ამასთან, ევროკავშირი რუსეთის წინააღმდეგ სანქციების ახალ პაკეტს განიხილავს, რომელიც 2027 წლის იანვრიდან, ანუ ერთი წლით ადრე, ვიდრე თავდაპირველად იყო დაგეგმილი, რუსული თხევადი ბუნებრივი აირის იმპორტის აკრძალვას ითვალისწინებს.
