აშშ-ის სააპელაციო სასამართლომ დონალდ ტრამპის მიერ დაწესებული ტარიფების უმეტესობა უკანონოდ გამოაცხადა, - ამის შესახებ ინფორმაციას სააგენტო Reuters-ი ავრცელებს.
აშშ-ის სააპელაციო სასამართლომ დაადგინა, რომ ქვეყნის პრეზიდენტმა, დონალდ ტრამპმა გლობალური ტარიფების დაწესებით „თავის უფლებამოსილებას გადააჭარბა“.
ვაშინგტონის ფედერალური სააპელაციო სასამართლოს დადგენილება დონალდ ტრამპის მიერ თებერვალში ჩინეთის, კანადისა და მექსიკის წინააღმდეგ დაწესებულ ტარიფებს და აპრილში დაწესებულ გლობალურ „საპასუხო“ ტარიფებს ეხება.
გადაწყვეტილებას მხარი სააპელაციო სასამართლოს 7-მა მოსამართლემ დაუჭირა, ხოლო 4-მა ხმა მის წინააღმდეგ მისცა.
სააპელაციო სასამართლოს გადაწყვეტილება აშშ-ის პრეზიდენტის მიერ ფოლადისა და ალუმინის იმპორტზე დაწესებულ ტარიფებს არ ეხება.
სასამართლოს გადაწყვეტილების თანახმად, ტარიფები ძალაში 14 ოქტომბრამდე დარჩება, რათა ამ დროის განმავლობაში დონალდ ტრამპის ადმინისტრაციამ აშშ-ის უზენაეს სასამართლოში აპელაცია შეძლოს.
