„ქართული ოცნების“ შემომწირველებთან მიმართებით მონიტორინგი 100%-ზე ხორციელდება - ყველა შემომწირველის შემოსავლები მოწმდება და ჯამდება, - ამის შესახებ ანტიკორუფციული ბიუროს ხელმძღვანელმა, რაჟდენ კუპრაშვილმა ჟურნალისტებთან პოლიტიკური პარტიების შემოწირულებაზე საუბრისას განაცხადა.
მისი თქმით, ყველა იმ ანგარიშთან დაკავშირებით, რაც პოლიტიკურ პარტიებს დეკლარაციაში აქვთ მითითებული, როგორც შემოსავლები, ისე გასავლები, ამავდროულად, ის აქტივობები, რომელიც შესაძლოა, რომ ანგარიშში მოცემული არ იყოს, მოწმდება.
„ქართული ოცნების“ შემომწირველებთან მიმართებით მონიტორინგი 100%-ზე ხორციელდება. ყველა შემომწირველის შემოსავლები მოწმდება და ჯამდება. ასევე [მოწმდება], აქტივობების, მათ შორის კონცერტების წარმომავლობა და ამის ანგარიშს ჩვენ საზოგადოებას გავაცნობთ.
მიმდინარე საარჩევნო პროცესში ანტიკორუფციულმა ბიურომ მიიღო გადაწყვეტილება, პოლიტიკურ პარტიებს 8-თვიანი ანგარიშები წარმოედგინათ. ეს თარიღი გახლდათ 31 აგვისტოს ჩათვლით. 31 აგვისტოს ჩათვლით ზოგმა პოლიტიკურმა პარტიამ ისევ აწარმოებინა ეს ანგარიშები და მათი უმრავლესობის ანგარიშები ანტიკორუფციულ ბიუროში წარმოდგენილია. ყველა ამ ანგარიშთან დაკავშირებით, რაც დეკლარაციაში აქვთ მითითებული, როგორც შემოსავლები, ისე გასავლები, ამავდროულად, მოწმდება ის აქტივობები, რომელიც შესაძლოა, რომ ანგარიშში მოცემული არ იყოს“, - განაცხადა რაჟდენ კუპრაშვილმა.
როგორც კუპრაშვილმა განმარტა, ანტიკორუფციული ბიუროს სტანდარტია, რომ მონიტორინგის შედეგებს მოქალაქეები არჩევნებამდე გაეცნონ.
„ჩვენი სტანდარტია, რომ მონიტორინგის შედეგებს მოქალაქეები არჩევნებამდე გაეცნონ. შესაბამისად, მომდინარე პროცესში ამ ანგარიშებზე მონიტორინგი დასრულებული იქნება“, - განაცხადა კუპრაშვილმა.
ცნობისთვის, საარჩევნო პარტიებმა, 2024 წლის 1-ელი ივლისიდან 12 სექტემბრის ჩათვლით პერიოდში, ჯამში, 9 571 423 ლარის შემოწირულება მიიღო.
კერძოდ, საქართველოს ანტიკორუფციული ბიუროს ვებგვერდზე გამოქვეყნებული ინფორმაციის მიხედვით, ყველაზე მეტი შემოწირულება - 8 მილიონ ლარზე მეტი, უფრო კონკრეტულად კი 8 246 460 ლარი „ქართულ ოცნებას“ აქვს მიღებული. ამ პერიოდის განმავლობაში პარტიაზე 250-მდე შემოწირულება მოდის, მათგან 40-მდე პირმა „ქართულ ოცნებას“ 60-60 ათასი ლარი ჩაურიცხა.
