ევროპულმა ქვეყნებმა რუსული ნავთობისა და გაზის შესყიდვა უნდა შეწყვიტონ, თუ მათ სურთ, რომ ვაშინგტონმა მოსკოვის წინააღმდეგ სანქციები გაამკაცროს, - ამის შესახებ აშშ-ის მინისტრმა ენერგეტიკის საკითხებში, კრის რაითმა Financial Times-თან ინტერვიუში განაცხადა.
მისი თქმით, ეს ვაჭრობა ვლადიმერ პუტინის ომის მანქანის დაფინანსებას წარმოადგენს.
კრის რაითის განცხადებით, ევროპულმა ქვეყნებმა ამის ნაცვლად ამერიკული თხევადი ბუნებრივი აირი, ბენზინი და სხვა წიაღისეული საწვავის პროდუქტები უნდა შეიძინონ, რათა შეასრულონ აშშ-ევროკავშირის სავაჭრო შეთანხმების პირობები, რომელიც ევროკავშირის ქვეყნებს 2028 წლის ბოლომდე 750 მილიარდი აშშ დოლარის ღირებულების ამერიკული ენერგორესურსების შესყიდვისკენ მოუწოდებს.
„თუ ევროპელები იტყვიან: „აღარ ვაპირებთ რუსული გაზის ყიდვას, აღარ ვაპირებთ რუსული ნავთობის ყიდვას“ - ექნება თუ არა ამას დადებითი გავლენა აშშ-ის მხრიდან სანქციების გამკაცრებაზე? აბსოლუტურად. ვფიქრობთ, რომ ეს ეკონომიკურად კარგია ევროპისთვის. გსურთ გყავდეთ უსაფრთხო ენერგო მომწოდებლები, რომლებიც თქვენი მოკავშირეები არიან და არა თქვენი მტრები. მეორე მიზეზი კი არის ტრამპის ადმინისტრაციის უზარმაზარი მიზანი და მჯერა, რომ ეს ასევე ევროკავშირის მიზანიცაა - რუსეთ-უკრაინის ომის დასრულება. რუსეთი თავის ომის მანქანას ნავთობისა და ბუნებრივი აირის ექსპორტით აფინანსებს და თუ ევროპის მხრიდან ამ პროდუქტების შესყიდვა შეწყდება ეს მათ ფულს შეამცირებს“, - აღნიშნა მინისტრმა.
Financial Times-ი წერს, რომ რაითი მიმდინარე კვირის ხუთშაბათს ევროკომისარს ენერგეტიკის საკითხებში დენ იორგენსენს შეხვდება, რათა განიხილოს ბლოკის გეგმები რუსეთის ენერგორესურსების შესყიდვისგან თავის შეკავების შესახებ და ასევე ის, თუ როგორ გეგმავს ევროკავშირი წელიწადში 250 მილიარდი დოლარის ღირებულების ამერიკული ენერგეტიკული პროდუქტების შეძენას. აშშ-ის მინისტრი ენერგეტიკის საკითხებში ასევე შეხვდება ევროპარლამენტის წევრებს, რომელთაგან ბევრმა მოითხოვა ცვლილებების შეტანა ევროკავშირ-აშშ-ს სავაჭრო შეთანხმებაში, რომელიც, მათი თქმით, აშშ-ის სასარგებლოდ მოქმედებს.
