ამირან გამყრელიძე: არსებობს თეორია, რომ შეიძლება „ომიკრონი“ პანდემიის დასასრულის დასაწყისი გახდეს

ერთ-ერთი თეორიაა, რომ შეიძლება „ომიკრონი“ პანდემიის დასასრულის დასაწყისი გახდეს, – ამის შესახებ საკოორდინაციო საბჭოს სხდომის დასრულების შემდეგ, დაავადებათა კონტროლის ეროვნული ცენტრის დირექტორმა განაცხადა.

ამირან გამყრელიძის თქმით, უკვე გამოჩნდა პირველი ნიშნები – „სამხრეთ აფრიკის მრუდმა თავი ქვემოთ ჩამოსწია“ და უკვე კლება შეიმჩნევა.

„ის, რომ ვაქცინირებულებს „ომიკრონი“ ბევრად იოლად გადააქვთ, ასევე არავაქცინირებულებშიც ჯერჯერობით მსუბუქი მიმდინარეობა და ახალი შტამის სწრაფი გავრცელება ნიშნავს, რომ შეიძლება საერთო კუმულაციური იმუნური ფენა უფრო სწრაფად ჩამოყალიბდეს ქვეყანაში. ერთ-ერთი თეორია და შეხედულებაა ის, რომ შეიძლება „ომიკრონი“ გახდეს პანდემიის დასასრულის დასაწყისი. მაგრამ მარტივად ნუ შევხედავთ. ის მოდის „ცუნამივით“ ძალიან დიდი რაოდენობით და შეიძლება ჯანდაცვაზე დიდი ზეწოლა იყოს“, – განაცხადა ამირან გამყრელიძემ.

საქართველოში „ომიკრონის“ შტამით ინფიცირების პირველი შემთხვევები 20 დეკემბერს გამოვლინდა.

25 ნოემბერს, სამხრეთ აფრიკაში, მეცნიერებმა განაცხადეს, რომ კორონავირუსის ახალი ვარიანტი აღმოაჩინეს, რომელსაც უამრავი მუტაცია აქვს. ჯანდაცვის მსოფლიო ორგანიზაციის მთავარმა მეცნიერმა, სუმია სვამინატანმა განაცხადა, რომ ახალ ვარიანტს სპაიკის პროტეინში არაერთი შემაშფოთებელი მუტაცია აქვს.

26 ნოემბერს, ჯანდაცვის მსოფლიო ორგანიზაციამ საგანგებო სხდომაზე სამხრეთ აფრიკაში გამოვლენილ კორონავირუსის ახალ ვარიანტს „შემაშფოთებელი“ უწოდა. ჯანდაცვის მსოფლიო ორგანიზაციაში აცხადებენ, რომ „ომიკრონთან“ დაკავშირებული საერთო რისკი კვლავ მაღალია.

136 ნახვა
desktop
mobile catfish