ევროპის საბჭოს ქვეყნებიდან 20 ქვეყანაში 150-მდე პარტიაა აკრძალული, მაგრამ არცერთ ამ პარტიას არ აქვს ისეთი დანაშაული თავისი სამშობლოსა და ხალხის წინაშე, როგორც „ნაციონალურ მოძრაობას“, – ამის შესახებ პარტია „ხალხის ძალის“ თავმჯდომარემ, დეპუტატმა სოზარ სუბარმა პარლამენტის საშემოდგომო სესიაზე სიტყვით გამოსვლისას განაცხადა.
სუბარის თქმით, შეუძლებელია, ევროპის სივრცეში არსებობდეს პარტია, რომლის მიმართაც ადამიანის უფლებათა ევროპულ სასამართლოს ჰქონდეს გამოტანილი განაჩენი, სადაც წერია, რომ ამ პარტიის მმართველობის პირობებში ქვეყანაში სისტემური და სისტემატური დანაშაულები ხდებოდა.
„ხალხი 12 წელია, ითხოვს „ნაციონალური მოძრაობის“ გასამართლებასო, თქვა ქალბატონმა ნინომ და სწორადაც თქვა, თუმცა ჩვენ, „ხალხის ძალა“, უკვე ორი წელია, დასაბუთებულად ვითხოვთ, რომ ვიდრე „ნაციონალური მოძრაობა“ არ გასამართლდება, მანამდე საქართველოში არ იქნება მშვიდობა, ქართული სახელმწიფო ვერ შედგება, როგორც ჩამოყალიბებული სახელმწიფო, რადგან ეს არის დამნაშავე პარტია და დამნაშავე პასუხს თუ არ აგებს და ისევ აქვს სურვილი პოლიტიკაში ყოფნის, ისევ ძალადობს ხალხის ცნობიერებაზე, ასეთ ქვეყანაში სიმშვიდე ვერ დამყარდება. ქალბატონმა ნინომ ევროპის ძალიან კარგი სტატისტიკა მოიყვანა, რომ ევროპის საბჭოს ქვეყნებიდან 20 ქვეყანაში 150-მდე პარტიაა აკრძალული. 22 პარტია აიკრძალა უკრაინაში, 13 აიკრძალა საფრანგეთში, რუმინეთში – 19 და აღარ ჩამოვთვლი სხვა ქვეყნებს, მაგრამ არცერთ ამ პარტიას არ აქვს ისეთი დანაშაული ჩადენილი თავისი სამშობლოსა და ხალხის წინაშე, როგორც „ნაციონალურ მოძრაობას“. შეუძლებელია, ევროპის სივრცეში არსებობდეს პარტია, აკრძალულიც და მოქმედიც, რომლის მიმართაც ადამიანის უფლებათა ევროპულ სასამართლოს ჰქონდეს გამოტანილი განაჩენი, სადაც წერია, რომ ამ პარტიის მმართველობის პირობებში ქვეყანაში ადგილი ჰქონდა სისტემურ და სისტემატურ დანაშაულებს. ეს ორი ერთმანეთის შემავსებელი, მაგრამ განსხვავებული ცნებაა. სისტემური ნიშნავს, რომ დანაშაული ქცეული იყო სისტემად, იყო ცხოვრების წესი იმ პარტიის და იმ ხელისუფლების, რომელიც ცხრა წლის განმავლობაში მართავდა ქვეყანას და ამას ჩადიოდა სისტემატურად“, – განაცხადა სოზარ სუბარმა.
როგორც სოზარ სუბარმა აღნიშნა, აგვისტოს ომთან დაკავშირებით „ნაციონალური მოძრაობა“ აუცილებლად უნდა გასამართლეს.
