ზაზა სარალიძის დედა: მოგიწოდებთ, ნუ დამტოვებთ მარტო

“უღრმესი მადლობა ყველას თანადგომისთვის და კიდევ ერთხელ მოგიწოდებთ, ნუ დამტოვებთ მარტო. მე შვილი აღარ მყავს აქ, გვერდით, თქვენი იმედი მაქვს ყველასი”, — ამ სიტყვებით მიმართა ზაზა სარალიძის დედამ, პარლამენტის წინ შეკრებილ აქციის მონაწილეებს. ამ წუთებში რუსთაველის გამზირზე პოლიციელზე თავდასხმისთვის ბრალდებული ზაზა სარალიძის მხარდასაჭერი აქცია მიმდინარეობს სლოგანით, “იმოქმედე სიმართლისთვის”.

ზაზა სარალიძის დედამ მოუწოდა საზოგადოებას, შეუერთდნენ მათ პროტესტს:

“იქნებ როგორმე მივაღწიოთ სამართალს თქვენი დახმარებით. 47 დღე მარტო იდგა ზაზა აქ, რამდენიმე ადამიანთან ერთად, მაგრამ ვერაფერს ვერ გახდა. რაც მეტი ვიქნებით, მგონი, უფრო გამოიფხეკენ ყურებს ჩვენი სამართალდამცავები და დასჯიან მკვლელებსა და მათ ხელის დამფარებლებს”.

აქცია თბილისის პარლამენტის შენობის წინ ამ წუთებშიც გრძელდება. მას შეუერთდნენ პარტია გირჩისა და ევროპული საქართველოს წევრები. ასევე, ზაზა სარალიძეს აქციაზე მხარდაჭერას უცხადებენ თეთრი ხმაურის მოძრაობის წარმომადგენლებიც.

ზაზა სარალიძე და მისი მხარდამჭერი ორი პირი დღეს სამართალდამცავის ფიზიკური შეურაცხყოფის ბრალდებით დააკავეს. ზაზა სარალიძემ სამართალდამცავების მიმართ აგრესია მას შემდეგ გამოხატა, რაც მას თბილისში, პარლამენტის შენობასთან კარვის გაშლის უფლება არ მისცეს. ეს პირველი შემთხვევა არაა, როცა მას ეს უფლება შეუზღუდეს.

წყარო: on.ge

42 ნახვა
desktop
mobile catfish