სისხლის სამართლის კანონმდებლობას ახალი კარი ემატება, რომლის დასახელებაც “სოციალური დაცვის ღონისძიებები“ იქნება და რომელიც ნარკომანიით დაავადებული პირების სავალდებულო მკურნალობის საკითხებს დაარეგულირებს.

შესაბამისი ცვლილებები “ქართული ოცნების“ მიერ პარლამენტში ინიცირებულ ანტინარკოტიკულ პაკეტში აისახა. საკითხი დღეს პარლამენტმა მეორე მოსმენით - მუხლობრივად განიხილა.

როგორც იურიდიულ საკითხთა კომიტეტის თავმჯდომარემ არჩილ გორდულაძემ სესიაზე განმარტა, სავალდებულო მკურნალობა განსაზღვრული იქნება იმდაგვარად, რომ პროკურორის მოთხოვნის საფუძველზე შესაბამისი კომისია პირის ნარკოდამოკიდებულების საკითხს განიხილავს - იმსჯელებს, არის თუ არა მიზანშეწონილი, რომ მას სავალდებულო მკურნალობა დაენიშნოს. დასკვნა მოსამართლეს წარედგინება და საბოლოო გადაწყვეტილებას სავალდებულო ნარკომკურნალობის დანიშვნის შესახებ სწორედ მოსამართლე მიიღებს.

გორდულაძის ინფორმაციით, მთავრობის დადგენილებით განისაზღვრება, თუ რომელ სტაციონარში, რა წესითა და პირობებით უნდა მოხდეს პირის სავალდებულო მკურნალობა.

მისივე თქმით, ნარკომანიით დაავადებულ პირს სასამართლოს მიერ მიღებული გადაწყვეტილების გასაჩივრების შესაძლებლობა ექნება.