დიდი ხანია, კოლექტიური „ნაცმოძრაობა“ დღის წესრიგს ვეღარ ქმნის, პატრონიც პენსიაში გავიდა, ერთმანეთის მიყოლებით უწევთ კანონის წინაშე პასუხისგება, თვთმმართველობის არჩევნებში მონაწილეობა-არ მონაწილეობის საკითხზე შიდა არეულობა აქვთ – ამ სასოწარკვეთის პირობებში რა ვქნათ, რა ვქნათო და მორიგი ერთდღიანი ტყუილი შეთხზეს, – ამის შესახებ „ერთიანი ნეიტრალური საქართველოს“ წარმომადგენელი, ვატო შაქარიშვილი სოციალურ ქსელში წერს და კოტე იოსელიანის განცხადებას ეხმაურება.

შაქარიშვილის თქმით, „ეს იყო ორსვლიანი უნიჭო, მარტივი კომბინაცია, რომლის მეორე ნაწილიც დილიდან დაიწყო, როცა ერთმანეთის მიყოლებით ბრიფინგებს მართავენ და ყვებიან ზღაპარს კოტე იოსელიანის „გატაცების“ შესახებ“.

„იმისათვის, რომ სიცრუე ადამიანების გარკვეულ ნაწილს მაინც დააჯერონ, ცდილობენ, ის მაქსიმალურად აბსურდული შინაარსის იყოს. ნაფტალინიდან ამოიღეს კოტე იოსელიანი, რომელიც 2018 წელს მის მიერ გაკეთებული ამორალური განცხადების გამო ბოდიშს იხდის. ცხადია, ბევრს გაუჩნდა კითხვა, რატომ შეაწუხა სინდისმა (რაც არცერთ ნაცს არ გააჩნია) 7 წლის შემდეგ ნაცმოძრაობის წევრს და ამავე პარტიის თავმჯდომარის მეუღლეს და რატომ გადაწყვიტა ღრმად მივიწყებული ამბის წამოწევა. იმიტომ, რომ ეს იყო ორსვლიანი უნიჭო და მარტივი კომბინაცია, რომლის მეორე ნაწილსაც დილიდან ვადევნებთ თვალს. დაეწყვნენ, ერთმანეთის მიყოლებით ბრიფინგებს მართავენ, მიხეილ ვივა-მედელიც გამოეხმაურა და ყვებიან ზღაპარს კოტე იოსელიანის „გატაცების“ შესახებ.

ალბათ სერიოზული პასუხის გაცემაც არ ღირს, რადგან ხელისგულზეა მორიგი უნიჭო სპექტაკლი, მაგრამ რამდენიმე კითხვაა, რაც კიდევ უფრო გაამარტივებს სიცრუის გამოაშკარავებას – თუ სამი დღის წინ გაიტაცეს და 8 საათზე მეტი ხნის განმავლობაში ეძებდა, რატომ არ მიმართა სამართალდამცავ უწყებებს? არაერთხელ გვინახავს, როგორ რეკავენ კამერების თანდასწრებით პოლიციაში და როგორ აკონტროლებენ წამების სიზუსტით სამართალდამცავების მოქმედებებს. რატომ არ მოითხოვა მყისიერად სამეთვალყურეო კამერების ჩანაწერების ამოღება და ნაცვლად ამისა, რატომ დაელოდა ორშაბათ დღეს, იმისათვის, რომ პოლიტიკური შოუ მოეწყო?

ვფიქრობ, რიტორიკულია ეს კითხვები, რადგან პასუხი ერთია – ეს არის მომაკვდავ რეჟიმში მყოფი კოლექტიური „ნაცმოძრაობის“ სასოწარკვეთის გამოძახილი“, – წერს ვატო შაქარიშვილი.