ათონელის სასახლესთან, 4 ოქტომბერს განვითარებულ მოვლენებთან დაკავშირებით დაკავებულმა ნინა სანდერმა განაცხადა, თუკი, მას დაუყოვნებლივ არ გაათავისუფლებენ, ის მშრალ შიმშილობას დაიწყებს.

სანდერმა სხდომის დაწყებისთანავე მოსამართლე თამარ მჭედლიშვილს დრო სთხოვა რათა მისი ჯანმრთელობის შესახებ ესაუბრა.

„მე ჩამოვედი გერმანიიდან ქართველი ხალხის ხმის უფლების დასაცავად, ვინაიდან არჩევნები გაყალბდა... რის გამოც, ეს მთავრობა არალეგიტიმურია და აღმასრულებელი ორგანო არალეგიტიმურია, სახელმწიფო მიტაცებულია. ქართველების, ევროპული მომავლის დასაცავად ვიდექი სისხლიან აქციებზე, სადაც ტერორი, დარბევა ხდებოდა, ჩემზეც განხორციელდა ჯგუფური ძალადობა ფორმიანი პოლიციელებისგან, წამაქციეს და ყელში ჩამარტყეს წიხლი. როგორც დანარჩენ მოქალაქეებზე, ჩემზეც გამოიყენეს ქიმიური იარაღი, რისი გამოყენების შემდეგაც, რასაც ტელევიზიით ვისმენ, ის სიმპტომები მაქვს მეც, მაქვს გულის პრობლემები, სახსრების პრობლემები... D ვიტამინის ნაკლებობა მაქვს, ასევე ვეგანურად ვცხოვრობ, ის ვიტამინი მოვითხოვე, რაც გერმანიაში დამინიშნეს, მეოთხე თვეა, D ვიტამინი არ მიმიღია. გულის უკმარისობა, ზურგის ტკივილი მაქვს, კარდიოგრამაც არ გადამიღეს. ტკივილის ატანა არის ტანჯვა, გავდივარ წამებას, ტკივილით ტანჯვას, ამას ემატება გულის პრობლემები. მეოთხე თვეა, D ვიტამინი არ მაღირსეს, ექიმმა მომატყუა ვეგანს და არავეგანური წამალი მომიტანა.

იანვრიდან დამისივდა ყბა, არც რენტგენი, არც არაფერი, ანტიბიოტიკი დამინიშნეს, რენტგენი გაფუჭებულიაო... არანაირი ყურადღება, არანაირი გამოკვლევა, არანაირი წამალი. ციხის დირექტორთანაც, ციხის ექიმთანაც დავასრულე საუბარი, ჯანმრთელობა ქიმიური იარაღით დამიზიანეს, მე ვარ პოლიტპატიმარი, მე თუ დაუყოვნებლივ არ გამათავისუფლებთ, დღესვე ვიწყებ მშრალ შიმშილობას, ყოველგვარი მედიკამენტების გარეშე, ეს ისედაც არ მაქვს. ციხეში მისვლისთანავე ჩემზე სისხლის სამართლის დანაშაული განხორციელდა, ჩემს გაშიშვლებას ითხოვდნენ, გერმანული გვარის გამო მეძახდნენ ფაშისტს",- განაცხადა სანდერმა.

მოსამართლე თამარ მჭედლიშვილმა ადვოკატებს ჰკითხა, იყო თუ არა მათთვის სანდერის მიერ გაჟღერებული ინფორმაცია ცნობილი, რაზეც ადვოკატებმა უარყოფითი პასუხი გასცეს და განაცხადეს, რომ დღესვე, მალხაზ ურთმელიძეს მიმართავენ განცხადებით.

ცნობისთვის, ათონელის სასახლესთან, 4 ოქტომბერს განვითარებულ მოვლენებთან დაკავშირებით ბექა ქელეხსაშვილს, მამუკა ლაბუჩიძეს, გურიელა ქარდავას, ვახტანგ ფიცხელაურს, ალექსანდრე ხაბეიშვილს, აბო ნავერიანს, ანტონ უპერს, ავთანდილ სურმანიძეს, გიორგი მულაძეს და თემურ ქურციკიძეს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით წარედგინათ, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილითაც აქვთ წარდგენილი, რაც ჯგუფურ ძალადობაში მონაწილეობას გულისხმობს.

მარიამ მეყანწიშვილს ბრალდება სსსკ-ის 226-ე მუხლით აქვს წარდგენილი, რაც ჯგუფური მოქმედების ორგანიზებას გულისხმობს.

ნანა სანდერს ბრალდება სსსკ-ის 225-ე მუხლის პირველი ნაწილით წარედგინა, რაც ჯგუფური ძალადობის ორგანიზებას გულისხმობს და სასჯელის ზომად 6-დან 9- წლამდე თავისუფლების აღკვეთას ითვალისწინებს. მას ბრალდება ასევე წარდგენილი აქვს სსსკ-ის 317-ე მუხლითაც, რაც გულისხმობს მოწოდებას საქართველოს კონსტიტუციური წყობილების ძალადობით შეცვლისკენ და სახელმწიფო ხელისუფლების დამხობისკენ, რაც სასჯელის სახედ და ზომად 9- წლამდე თავისუფლების აღკვეთას ითვალისწინებს.