როგორც პარტია „გახარია საქართველოსთვის" წევრმა, გიორგი გახარიას ადვოკატმა ბერდია სიჭინავამ სასამართლო სხდომის დაწყებამდე ჟურნალისტებს განუცხადა, „კლოუნადა მიმდინარეობს“.

„ეს არის ყვარყვარე თუთაბერის მიერ შექმნილი სამართლებრივი სისტემა, სადაც ყველას უშვებენ ციხეში, ყველას პოლიტიკურად დასჯას ცდილობენ. გახარია არის ბიძინა ივანიშვილის პერსონალური ვენდეტის ობიექტი, რომელიც მას დაანონსებული ჰქონდა 26 ოქტომბრამდე მისივე მიცემულ ინტერვიუში. რა თქმა უნდა, პოლიტიკური საქმიანობა, რომლის შესაზღუდადაც კეთდება ეს ყველაფერი, მის პოლიტიკურად გასანეიტრალებლად, ვერ იქნება მიღწეული...

რაც შეეხება ბრალის დამძიმების საკითხს, ყველანაირი მოლოდინი არსებობს. აქედან შესაძლოა გამოვიდეთ და აჭარის პროკურატურაში დაგვიბარონ, დიტო სამხარაძეზე თავდასხმის საქმეზეც ბრალი წარუდგინონ. ეს არის კლოუნადა: "მართლმსაჯულება ივანიშვილის სახელით". გიორგი გახარია ბრალს არ აღიარებს. ამას სამართლებრივ პროცესთან კავშირი არ აქვს. არ არსებობს ფაქტობრივი სამართლებრივი საფუძვლები და მტკიცებულებები, რაც დაადასტურებს მის ბრალეულობას.

თუ სურს სასამართლოს გიორგი გახარიას დისტანციურად მოუსმინოს, რატომაც არა. რა თქმა უნდა [სურს მონაწილეობის მიღება] თუ მისცემს სასამართლო შესაძლებლობას, დისტანციურად ჩაერთვება. გახარიას მიმართ ახლა მიმდინარეობს დევნა. ივანიშვილის იურისდიქციაში გახარია თავს არ მოიხვედრებს“,- აღნიშნა ბერდია სიჭინავამ.