თავდაცვის ყოფილი მინისტრის, თინათინ ხიდაშელის განცხადებით, მაგისტრატი მოსამართლის წინაზე გამოკითხვა მის მიერ ირანთან დაკავშირებულ განცხადებას ეხებოდა.

როგორც ხიდაშელმა გამოკითხვის დასრულების შემდეგ ჟურნალისტებს განუცხადა, მისი ამოცანა მიღწეულია, რომ ამ საკითხით დაინტერესდნენ.

ხიდაშელი იმედოვნებს, რომ თუ რამე საფრთხე ემუქრება ქვეყანას, შესაბამისი უწყებები საკითხს გაარკვევენ.

„მგონი, მათ განცხადებაში ერთმნიშვნელოვნად იყო ნათქვამი, რა აინტერესებდათ, ამიტომ, მისგან განსხვავებული ვერაფერს გეტყვით. ინგას [გრიგოლია] ეთერში ჩემი გამოსვლით იყვნენ დაინტერესებული. კითხვები მხოლოდ და მხოლოდ ამ თემაზე იყო. ასე გამოკითხვა ყოველთვის არის ფაქტობრივ გარემოებებზე. შეფასებები და არგუმენტებიც შეიძლება დააინტერესოთ, მაგრამ ეს არ არის საინტერესო. ბუნებრივია, ამ კითხვებზე პასუხები არასდროს არის. ეს პროცესი არის ახლა სამართლებრივი. შესაბამისად, მოქცევაც არის სამართლებრივი. ყველა ფაქტი, რომელიც არსებობს და თუკი არსებობს, საჯარო სივრცეშია ხელმისაწვდომი. მე ვარ კერძო პირი, რომელსაც წვდომა მაქვს მხოლოდ იმ ინფორმაციაზე,რომელიც საჯარო სივრცეში არის ხელმისაწვდომი. შეიძლება ადამიანს სხვა წყაროებიდან ჰქონდეს ინფორმაცია და ეს უნდა გაარკვიონ, ამიტომ, კითხვების დასმაში არ არის პრობლემა, ეს ნორმალური პროცესია. სიმართლე გითხრათ, სასამართლოშიც ვუთხარი და ახლაც შემიძლია გავიმეორო, ჩემი ამოცანა მიღწეულია. მინდოდა, რომ როგორც ცივილიზებულ ქვეყნებში ხდება, ვიღაც საყვირს ჩაბერავს საფრთხის შესახებ და მერე საგამოძიებო ორგანოები ამ საკითხს მოიკვლევენ... როგორც ჩანს, ჩემი ამოცანა შესრულებულია, ისინი დაინტერესდნენ. თუ რამე საფრთხე ემუქრება ქვეყანას, იმედი დავიტოვოთ, რომ ამას გაარკვევენ. თუ არა, ყველა მადლობას გადავუხდით, რომ გარკვეულია. იმედი უნდა დავტოვოთ, რომ ახლა ამ საკითხს ფუნდამენტურად შეისწავლიან, ან აღმოჩნდება პრობლემა ან არა“,-განაცხადა ხიდაშელმა.

რაც შეეხება კითხვას, ხომ არ არის მისი გამოკითხვა ერთგვარი დაშინების მცდელობა, თავდაცვის ყოფილმა მინისტრმა უპასუხა, რომ მას „ვერაფრით შეაშინებენ.

„არ ვიცი, ვის რა მცდელობა აქვს, მე რომ ვერაფრით შემაშინებენ, მგონი ამ 32 წლის განმავლობაში, რაც ტელეეკრანებზე მხედავს ხალხი, ეს დადასტურებულია. მართლა ვერ ვხედავ ვერანაირ პრობლემას მოწმის სახით რომ იკითხები რამე საკითხზე“,-განაცხადა ხიდაშელმა.

თავდაცვის ყოფილი მინისტრის განმარტებით, მას არ უთქვამს, რომ საქართველოში ტერორისტებს ამზადებენ.„ამ უნივერსიტეტის ფილიალია, არც უნივერსიტეტია. საბედნიეროდ, აკრედიტაცია მიღებული არ აქვს, მაგრამ ფილიალი, რაღაც ტიპის წარმონაქმნი საქართველოში ფუნქციონირებს, რომელსაც მიხედვა სჭირდება. მე არსად მითქვამს, რომ საქართველოში ტერორისტებს ამზადებენ. გიდასტურებთ, რომ ეს უნივერსიტეტი ზუსტად ამისთვის არის დასანქცირებული მინიმუმ 3 ქვეყნის კანადის, გერმანიის, აშშ-ს მიერ და ეს დოკუმენტი არსებობს“, - განაცხადა ხიდაშელმა.

ცნობისთვის, გივი თარგამაძე, თინა ხიდაშელი, გუბაზ სანიკიძე და გიორგი კანდელაკი სისხლის სამართლის კოდექსის 319-ე მუხლით მიმდინარე გამოძიების ფარგლებში არიან გამოკითხვაზე დაბარებული, რაც უცხო ქვეყნისათვის, უცხოეთის ორგანიზაციისათვის ან უცხოეთის კონტროლს დაქვემდებარებული ორგანიზაციისთვის მტრულ საქმიანობაში დახმარებას გულისხმობს.