„საერთაშორისო გამჭვირვალობა-საქართველომ“ 2024 წლის 25 ნოემბრიდან 2025 წლის 21 ოქტომბრის პერიოდში პარლამენტის საქმიანობა შეაჯამა.

როგორც ორგანიზაციის მიერ გავრცელებულ ინფორმაციაშია ნათქვამი, ანგარიშის მიხედვით, გაუქმდა პარლამენტის მნიშვნელოვანი სტრუქტურული ერთეულები და საკანონმდებლო ორგანო დახურულ და გაუმჭვირვალე უწყებად იქცა.

„პარლამენტის პირველი სხდომა ჩატარდა საქართველოს კონსტიტუციის უხეში დარღვევით და პარლამენტმა ცნო წევრების უფლებამოსილება მიუხედავად იმისა, რომ მათი არჩევის კანონიერება საკონსტიტუციო სასამართლოში იყო გასაჩივრებული. პარლამენტის პირველი სხდომა პრეზიდენტს არ მოუწვევია, რისი უფლებამოსილებაც მხოლოდ მას გააჩნდა. 2024 წლის არჩევნების შემდეგ ოთხმა ოპოზიციურმა პარტიამ მიიღო მანდატები. სამმა უარი თქვა მანდატებზე, ხოლო ერთი („გახარია საქართველოსთვის“) ფორმალურად ინარჩუნებდა მანდატებს, მაგრამ არ მონაწილეობდა საქმიანობაში. მოგვიანებით 2025 წლის ოქტომბერში ისინი შეუერთდნენ საპარლამენტო საქმიანობას. მმართველი პარტიის სიით არჩეული დეპუტატები გავიდნენ უმრავლესობიდან და შექმნეს „ხალხის ძალა“ და „ევროპელი სოციალისტები“. ამ გზით შეიქმნა ფორმალური, მაგრამ არა რეალური ოპოზიცია. პარლამენტის ახალი რეგლამენტით გაუქმდა მინისტრის საათი და თემატური მოკვლევის ინსტიტუტი; საანგარიშო პერიოდში არცერთ კომიტეტს არ მიუწვევია თანამდებობის პირი მოსასმენად; დეპუტატების მიერ მხოლოდ 4 სადეპუტატო კითხვა გაიგზავნა.

“ქართულმა ოცნებამ” შექმნა დროებითი საგამოძიებო კომისია, რომელიც გამოყენებულ იქნა პოლიტიკური ოპონენტების ანგარიშსწორებისთვის. კომისიის დასკვნა საფუძვლად დაედო საკონსტიტუციო სარჩელს, რომელიც ოპოზიციური პარტიების გაუქმებას და პოლიტიკური პლურალიზმის მოშლას ისახავს მიზნად. აღსანიშნავია, რომ სწორედ ხელოვნურად შექმნილმა ოპოზიციურმა ფრაქციამ გახადა შესაძლებელი აღნიშნული კომისიის შექმნა.

კომიტეტები აღარ განიხილავენ ისეთი მნიშვნელობის საკითხებს, როგორებიცაა დროებითი კომისიების შექმნა, მთავრობისთვის ნდობის გამოცხადება, პრეზიდენტის არჩევა, იმპიჩმენტი და სხვა. გაუქმდა პარლამენტის მნიშვნელოვანი სტრუქტურული ერთეულები. პარლამენტი დახურულ და გაუმჭვირვალე უწყებად იქცა. გაუქმდა ღია მმართველობის საბჭო; პარლამენტი და კომიტეტები აღარ არიან ვალდებულნი წარადგინონ წლიური სამოქმედო გეგმები; ვებგვერდზე აღარ ქვეყნდება სამუშაო ჯგუფების ოქმები და შეხვედრების დეტალური ინფორმაცია; საკანონმდებლო წინადადებები აღარ განიხილება კომიტეტებში და მხოლოდ დეპუტატებთან იგზავნება.

პარლამენტის მიერ მიღებულია კანონებით ფაქტობრივად გაუქმდა სიტყვისა და გამოხატვის თავისუფლება და შეკრების თავისუფლება; გაუარესდა მედიის თავისუფლების გარანტიები, შეიზღუდა პასიური საარჩევნო უფლება. პარლამენტმა საბოლოოდ თქვა უარი სამოქალაქო საზოგადოებასთან თანამშრომლობაზე და მიიღო კანონები, რომლის მიზანიც ქართული არასამთავრობო ორგანიზაციების გაუქმებაა”, - ნათქვამია ანგარიშში, რომელსაც „საერთაშორისო გამჭვირვალობა - საქართველო“ ავრცელებს.