12 ხრიკი, რომელიც დაგეხმარებათ წონის დაკლებაში

ამჟამად, ჭარბ წონად განისაზღვრება, თუ ადამიანის სხეულის მასის ინდექსი 25-ზე მეტია, ხოლო 30-ზე მეტი სიმსუქნედ ითვლება. ზოგიერთი კვლევის მიხედვით, წონის 5-10%-მა კლებამაც კი შეიძლება შეცვალოს თქვენი ჯანმრთელობის მდგომარეობა. გთავაზობთ წონის დაკლების რამდენიმე დადებით მხარეს:

  • დიაბეტის რისკის შემცირება;
  • არტერიული წნევის დარეგულირება;
  • ქოლესტერინის დონის გაუმჯობესება;
  • გულის დაავადებების რისკის შემცირება;
  • ზოგიერთი კიბოს რისკის შემცირება;
  • გაუმჯობესებული მოქნილობა;
  • ზოგადი ტკივილის შემცირება;
  • სისხლში შაქრის დონის გაუმჯობესება;
  • ინსულტის რისკის შემცირება;
  • ზურგის ტკივილის შემცირება;
  • ოსტეოართრიტის სიმპტომების რისკის შემცირება ან გაუმჯობესება;
  • ძილის აპნოეს სიმპტომების რისკის შემცირება ან გაუმჯობესება.

ბრიტანეთის ჯანდაცვის ეროვნული სამსახური (NHS) გთავაზობთ წონის დაკლების 12 ხრიკს:

>

1. არ გამოტოვოთ საუზმე

საუზმის გამოტოვებით შეიძლება აუცილებელი საკვები ნივთიერებები ვერ მიიღოთ და შიმშილის გრძნობის გამო  უფრო მეტად ისუსნაოთ მთელი დღის განმავლობაში. ეს კი წონის კლებაში ვერ დაგეხმარებათ.

2. მიირთვით რუტინულად

დღის განმავლობაში ერთსა და იმავე დროს ჭამა ხელს უწყობს კალორიების უფრო სწრაფად წვას. ეს ასევე ამცირებს ცხიმისა და შაქრის შემცველი საკვებით წახემსების ცდუნებას.

3. მიირთვით ბევრი ხილი და ბოსტნეული

ხილი და ბოსტნეული დაბალკალორიული და დაბალცხიმიანია, ამავდროულად მდიდარია უჯრედისით, რაც   3 აუცილებელი პირობაა წონის კლებისთვის. ისინი ასევე შეიცავს უამრავ ვიტამინსა და მინერალს.

4. გაზარდეთ ფიზიკური დატვირთვა

ფიზიკური აქტივობა არის წონის დაკლებისა და ჯანსაღი წონის შენარჩუნების გასაღები. ვარჯიში დაგეხმარებათ დაწვათ ზედმეტი კალორია, რომელსაც ვერ დაკარგავთ მხოლოდ დიეტის მეშვეობით.

5. დალიეთ ბევრი წყალი

ადამიანები ზოგჯერ წყურვილს შიმშილში ურევენ. შესაძლოა, თქვენ იღებდეთ დამატებით კალორიებს, როდესაც სინამდვილეში ერთი ჭიქა წყალი  გჭირდებათ.

6. მიირთვით უჯრედისის შემცველი საკვები

უჯრედისი დაგეხმარებათ დანაყრებაში, რაც წინ გადადგმული ნაბიჯია წონის დასაკლებად. მიირთვით ხილი და ბოსტნეული, შვრია, დაუცეხვავი პური, ყავისფერი ბრინჯი და პასტა, ლობიო, ბარდა და ოსპი.

7. წაიკითხეთ საკვების ეტიკეტები

საკვების ეტიკეტის კითხვა დაგეხმარებათ ჯანმრთელი ვარიანტების არჩევაში. გამოიყენეთ კალორიების შესახებ ინფორმაცია იმის გასარკვევად, თუ როგორ თავსდება კონკრეტული საკვები თქვენს ყოველდღიურ მენიუში.

8. ჭამეთ პატარა თეფშიდან

პატარა თეფშების გამოყენება დაგეხმარებათ მცირე ულუფების შერჩევაში. დაახლოებით 20 წუთია საჭირო, რათა კუჭმა ტვინს აცნობოს, რომ ის სავსეა, ამიტომ ნელა იკვებეთ და შეწყვიტეთ ჭამა სრულ დანაყრებამდე.

9. არ აკრძალოთ საკვები

არ აუკრძალოთ თავს განსაკუთრებით ის საჭმელი, რაც მოგწონთ. საკვების აკრძალვა მხოლოდ უფრო მეტად მოგანდომებთ მას. უბრალოდ, არ გადააჭარბოთ ყოველდღიურად დაშვებულ კალორიებს.

10. ნუ შეინახავთ შინ მავნე  საკვებს

ცდუნების თავიდან ასაცილებლად, სახლში მავნე საკვების ნაცვლად შეარჩიეთ ჯანსაღი ალტერნატივა, მაგალითად ხილი, ნატურალური წვენი…

11. შეამცირეთ ალკოჰოლი

სტანდარტული ჭიქა ღვინო შეიძლება შეიცავდეს იმდენ კალორიას, რამდენსაც შოკოლადის ნაჭერი. დროთა განმავლობაში, ზედმეტი დალევა იწვევს წონის მომატებას.

12. დაგეგმეთ თქვენი კვება

შეეცადეთ დაგეგმოთ ერთი კვირის საუზმე, ლანჩი, სადილი და წახემსება ისე რომ, სწორად გადაანაწილოთ კალორიები. შეიძლება თქვენთვის სასარგებლო იყოს ყოველკვირეული საყიდლების სიის შედგენა.

თრიალეთი TV