ნებისმიერი პარტიის მიერ დიდი აქციების გამართვა კოვიდშემთხვევების ფონზე სარისკოა — დეგნანი

ამერიკის ელჩი საქართელოში კელი დეგნანი აცხადებს, რომ ქვეყანაში კორონავირუსის მაღალი მაჩვენებლის ფონზე დიდი აქციების ჩატარება სარისკოა, მიუხედავად იმისა, რომელი პოლიტიკური პარტია ატარებს მას.

“ვფიქრობ, რომ ცოტა სარისკოა დიდი აქციების გამართვა, რომელიმე პოლიტიკური პარტიის მიერ, როცა ამჟამად საქართველოში კოვიდშემთხვევების ძალიან დიდი რაოდენობაა. როგორც ჩანს, ეს არ არის კარგი დრო ხალხის დიდი ჯგუფების შეკრებისთვის”, — აღნიშნავს დეგნანი.

მან, ასევე, შეკრების კონსტიტუციური უფლების დროს შეხედულებების მშვიდობიანად გამოხატვის მნიშვნელობას გაუსვა ხაზი.

“მთავარი სიტყვა აქ არის “მშვიდობიანად”. ორ დღეში არჩევნებია, რომელიც იყო ხანგრძლივი და საკამათო. ჩვენ უბრალოდ მოვუწოდებთ ამომრჩევლებს, მხარდამჭერებს — გთხოვთ შეინარჩუნოთ სიმშვიდე. ყველა მხარის პოლიტიკური ლიდერების მოწოდებები სიმშვიდისკენ იყო ძალიან საპასუხისმგებლო და მნიშვნელოვანი და იმედი მაქვს, რომ მხარდამჭერები ამომრჩევლებს საშუალებას მისცემს გამოვიდნენ შაბათს მშვიდ გარემოში, რათა ხმა მისცენ და ეს არის ის, რისი იმედიც გვაქვს”, — აცხადებს დეგნანი.

30 ოქტომბერს საქართველოში ადგილობრივი თვითმმართველობის მეორე ტური ტარდება. ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 20 მუნიციპალიტეტში გაიმართება. მეორე ტური ჩატარდება თბილისშიც.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ იყო მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებდა. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

90 ნახვა
desktop
mobile catfish