სახლი შესასწავლია – წერილი ბათუმის მერიას კორპუსის ჩამონგრევამდე 50 დღით ადრე

ბათუმში, 26 მაისის ქუჩის იმ სახლიდან, რომლის სადარბაზოც ჩამოინგრა, ბათუმის მერის მოვალეობის შემსრულებელს, კორპუსის ჩამონგრევამდე 50 დღით ადრე  სწერდნენ, რომ სახლის მესამე სადარბაზო ავარიულ მდგომარეობაშია. კორპუსის მცხოვრებლები არჩილ ჩიქოვანს მის შესწავლას სთხოვდნენ.

ოფიციალურად, განცხადებით, ამ საკითხზე არჩილ ჩიქოვანს სახლის მესამე სადარბაზოს მაცხოვრებლებმა 2021 წლის 17 აგვისტოს მიმართეს. კორპუსის პირველი სადარბაზო 8  ოქტომბერს ჩამოინგრა. შემთხვევას 9 ადამიანის, მათ შორის სამი ბავშვის სიცოცხლე ემსხვერპლა.

„მოგახსენებთ, რომ მესამე სადარბაზოს აივნები, განსაკუთრებით 26 მაისისა და კლდიაშვილის ქუჩების კუთხე, იმყოფება ავარიულ მდგომარეობაში. შესამჩნევად დაწეულია აივნების კუთხე, თავისით ვარდება ბათქაში, რომლითაც დაფარულია არმატურა და არმატურის ჟანგიანი ფენა ინტენსიურად.

გთხოვთ უმოკლეს ვადაში შეგვიფასოთ შექმნილი მდგომარეობა და დაგვეხმაროთ პრობლემის აღმოფხვრაში“,  – ვკითხულობთ წერილში.

26 მაისის ქუჩაზე ჩამონგრეული კორპუსის მცხოვრებთა წერილი ბათუმის მერიას. წერილი სადარბაზოს ჩამონგრევამდე 50 დღით ადრეა დაწერილი.

2021 წლის 23 აგვისტოს, ამ წერილის ავტორებს მერიის საქალაქო ინფრასტრუქტურისა და კეთილმოწყობის სამმართველოს უფროსმა ალექსანდრე მჟავანაძემ აცნობა, რომ მერიას შესაბამისი პროგრამა არ ჰქონდა:

„თქვენს განცხადებაზე [# 19/1421229171-14] გაცნობებთ, რომ  ა(ა)იპ ინფრასტრუქტურისა და კეთილმოწყობის სამმართველოს პროგრამით არ არის გათვალისწინებული საცხოვრებელ სახლებზე აივნების ან აივნების მოაჯირების სარეაბილიტაციო სამუშაოების წარმოება. აღნიშნული საკითხის წარმოება წარმოადგენს ბინათმესაკუთრეთა ამხანაგობის წევრების ან ბინის მესაკუთრეების ვალდებულებას.“

მერიის საქალაქო სამმართველოს ინფორმაციით, რომელიც ტრაგედიიდან რამდენიმე დღეში გაავრცელეს, 26 მაისის №13-ში მდებარე კორპუსის ჩამონგრევის შედეგად დაზიანდა არა მარტო კორპუსის ჩამოუშლელი ნაწილი, არამედ მომიჯნავედ, მემედ აბაშიძის #56-ში მდებარე საცხოვრებელი კორპუსიც.

სამხარაულის ექსპერტიზის დასკვნის მიხედვით: „ვიზუალური კვლევით მიღებული შედეგების ანალიზის საფუძველზე შეგვიძლია დავასკვნათ, ქ. ბათუმში, 26 მაისის ქუჩა N13-ში, 26 მაისის ქუჩაზე განთავსებული შენობის ნაკვეთური იმყოფება ავარიულ მდგომარეობაში, რომლის აღდგენა-გამაგრებითი ღონისძიებების ჩატარება არარენტაბელურია. საჭიროა განხორციელდეს შენობის დემონტაჟი სპეციალურად დამუშავებული პროექტის მიხედვით, უსაფრთხოების ნორმების სრული დაცვით“.

წყარო: batumelebi.netgazeti.ge

92 ნახვა
desktop
mobile catfish