საქართველოს დამოუკიდებლობის აღდგენაზე ჩატარებული რეფერენდუმიდან 31 წელი გავიდა

დღეს, 31 მარტს, საქართველოს დამოუკიდებლობის აღდგენაზე ჩატარებული რეფერენდუმიდან 31 წელი გავიდა. შედეგების საფუძველზე უზენაესმა საბჭომ მიიღო დამოუკიდებლობის აქტი და გაათავისუფლა საქართველო 70-წლიანი საბჭოთა ოკუპაციისგან.

“საქართველო არის დამოუკიდებელი, ერთიანი და განუყოფელი სახელმწიფო, რაც დადასტურებულია 1991 წლის 31 მარტს ქვეყნის მთელ ტერიტორიაზე, მათ შორის აფხაზეთის ასსრ-ში და ყოფილ სამხრეთ ოსეთის ავტონომიურ ოლქში ჩატარებული რეფერენდუმით და 1991 წლის 9 აპრილის საქართველოს სახელმწიფოებრივი დამოუკიდებლობის აღდგენის აქტით”, – წერია საქართველოს კონსტიტუციაში.

საქართველოს რესპუბლიკის ცენტრალურმა სარეფერენდუმო კომისიამ 31 მარტის რეფერენდუმის შედეგები 4 აპრილს შეაჯამა, შედეგები კი 5 აპრილს გამოქვეყნდა პრესაში. ცენტრალურმა სარეფერენდუმო კომისიამ დაადგინა:

  • საქართველოს რესპუბლიკაში ამომრჩეველთა საერთო რიცხვი იყო 3 672 403;
  • რეფერენდუმის მონაწილეთა რიცხვი იყო 3 334 286, რაც შეადგენს ამომრჩეველთა საერთო რიცხვის 90,7 %-ს;
  • კენჭისყრის მონაწილეთა რიცხვი იყო 3 326 100, რაც შეადგენს ამომრჩეველთა საერთო რიცხვის 90,5%-ს;
  • სარეფერენდუმოდ გამოტანილი საკითხის დადებითად გადაწყვეტის, „დიახ” მომხრეთა რიცხვი იყო 3 295 493, რაც შეადგენს კენჭისყრის მონაწილეთა რიცხვის 99,08%-ს;
  • სარეფერენდუმოდ გამოტანილი საკითხის უარყოფითად გადაწყვეტის, „არა” მომხრეთა რიცხვი იყო 16 917, რაც შეადგენს კენჭისყრის მონაწილეთა რიცხვის 0,51%-ს.

ეს დღე საქართველოს მოსახლეობას მიულოცა ქვეყნის პრემიერ-მინისტრმა, ირაკლი ღარიბაშვილმა:

“31 მარტის რეფერენდუმმა მყარი საფუძველი ჩაუყარა თანამედროვე ქართული სახელმწიფოს მშენებლობას, შეუქცევადი გახადა სვლა მიზნისაკენ, რომლისთვისაც ქართველთა არაერთი თაობა იბრძოდა და შრომობდა”.

105 ნახვა
desktop
mobile catfish