„მიბრძანდით და აიცერით“ – ამირან გამყრლიძის რეკომენდაციები მოქალაქეებს

დაავადებათა კონტროლის ეროვნული ცენტრის ხელმძღვანელი ამირან გამყრელიძე ბოლო ორი კვირის განმავლობაში ქვეყანაში covid-ინფიცირების მზარდ სტატისტიკას აფასებს და ამბობს, რომ შემთხვევების მატება, ძირითადად, ომიკრონის ახალი შტამის BA4 და BA5 ხარჯზეა, რომელიც მაღალი გადამდებობით ხასიათდება.

როგორც მან BM.ge-სთან თქვა, ინფიცირების შემთხვევები მზარდია არა მხოლოდ საქართველოში, არამედ ევროპის 40-მდე ქვეყანაშიც.

„შემთხვევათა რაოდენობა იზრდება, რაც მოსალოდნელი იყო. მომატებულია ეპიდსიტუციისთვის დამახასიათებელი ყველა მაჩვენებელი – მხედველობაში მაქვს ინციდენტობა 100 000 მოსახლეზე; ასევე მზარდია დადებითობის მაჩვენებელი. საშუალოდ დღეში 10 000-მდე ტესტი ტარდება…

სამედიცინო დაწესებულებისადმი მიმართვიანობა გაიზარდა, თუმცა არც თუ ძალიან, ამიტომ ჰოსპიტალურ სექტორზე ძლიერი დაწოლა ჯერ არაა, მაგრამ თუ ინფიცირება გაიზარდა, ეს მოსალოდნელია“, – თქვა მან bm.ge-სთან და მოქალაქეებს კიდევ ერთხელ მოუწოდა, რომ აიცრან.

„ჩვენი მთავარი რეკომენდაცია აცრების ინტენსიფიცირებაა. მიბრძანდით და აიცერით, რათა მაღალი იმუნური ფენით შევხვდეთ შემოდგომას. ინფექციას სხვა ვერაფერი და ვერავინ შეაკავებს.

მოგეხსენებათ, covid-ის მართვის სტრატეგია შეცვლილია და მასობრივი, დიდი ჩაკეტვები ან გადაადგილების შეზღუდვა აღარ განიხილება. ძირითადი აქცენტი გახლავთ ვისწავლოთ თანაცხოვრება კოვიდთან ერთად“, – აღნიშნა NCDC-ის დირექტორმა.

ამირან გამყრელიძე ასევე მოუწოდებს მოქალაქეებს, რომ დახურულ სივრცეებში ატარონ პირბადე.

„მესმის ზაფხულია და რთულია, მაგრამ სასურველია, დახურულ სივრცეებში ვატაროთ პირბადე“, – თქვა მან.

365 ნახვა
desktop
mobile catfish