ლევან დავითაშვილი – დღეს და წლების წინ არსებული მდგომარეობა ცა და დედამიწასავით განსხვავდება ერთმანეთისგან ეკიპირების, ვერტმფრენების მომზადების კუთხით – თადარიგს ვიჭერთ უფრო რთული გამოწვევებისთვის

დღეს და წლების წინ არსებული მდგომარეობა ცა და დედამიწასავით განსხვავდება ერთმანეთისგან მომზადების, ეკიპირების, ტექნიკური აღჭურვის და ვერტმფრენების მომზადების კუთხით. ვერტმფრენების პარკი გარემონტდა შარშან და შარშანწინ იმისთვის, რომ მათ წინაშე დღეს არსებული ამოცანები შეასრულონ. ღმერთმა დაგვიფაროს, მაგრამ თადარიგს ვიჭერთ უფრო რთული გამოწვევებისთვის, რომ თუ ასეთი დადგება ქვეყანაში, მზად ვიყოთ, – ამის შესახებ ეკონომიკისა და მდგრადი განვითარების მინისტრმა ლევან დავითაშვილმა მთავრობის სხდომის დასრულების შემდეგ გამართულ ბრიფინგზე განაცხადა.

მედიის წარმომადგენლები დაინტერესდნენ, რატომ ყიდის ძვირადღირებულ ვერტმფრენს სახელმწიფო.

როგორც დავითაშვილმა განმარტა, ეს ვერტმფრენი უნდა ჩანაცვლდეს არა ფუფუნების საგნით, არამედ ისეთი ტიპის საფრენი საშუალებებით, რომელიც გამოყენებული იქნება სამაშველო ოპერაციებში, საგანგებო სიტუაციებში, ან სხვა საჭიროებებისთვის, რაც ქვეყანას აქვს.

„ეს არის კონკრეტული მოლაპარაკება, კონკრეტული გარიგება, რაზეც პრემიერი საუბრობდა. არის მოლაპარაკება კონკრეტულ მწარმოებელთან, რომ ჩანაცვლდეს ეს ვერტმფრენი არა ფუფუნების საგნით, არამედ ისეთი ტიპის საფრენი საშუალებებით, რომელიც გამოყენებული იქნება სამაშველო ოპერაციებში, საგანგებო სიტუაციებში, ან სხვა საჭიროებებისთვის, რაც ქვეყანას აქვს. ბევრი სპეკულაცია იყო ამ თემასთან დაკავშირებით ბოლო დღეების განმავლობაში – სად არის სახელმწიფო, ვართ თუ არა მომზადებული… მახსოვს 2017 წლის ხანძრის ქრობის პროცესშიც აქტიურად ვიყავი ჩართული, ველზე მომიწია მუშაობა და მაშინ ქვეყანას მართლაც ბევრი გამოწვევა ჰქონდა: ეკიპირების, წვრთნის, მომზადების და ა.შ. მიმართულებით. იმ ხანძარმა ძალიან ბევრი რამ შეცვალა სამაშველო სამსახურებში. დღეს და წლების წინ არსებული მდგომარეობა ცა და დედამიწასავით განსხვავდება ერთმანეთისგან მომზადების კუთხით, ეკიპირების კუთხით, ტექნიკური აღჭურვის და ვერტმფრენების მომზადების კუთხით. ვერტმფრენების პარკი გარემონტდა შარშან და შარშანწინ იმისთვის, რომ მათ წინაშე დღეს არსებული ამოცანები შეასრულონ. ღმერთმა დაგვიფაროს, მაგრამ თადარიგს ვიჭერთ უფრო რთული გამოწვევებისთვის, რომ თუ ასეთი დადგება ქვეყანაში, მზად ვიყოთ. დღეს საბედნიეროდ კონტროლშია ეს პროცესი და [ხანძარი] ლოკალიზებისკენ მიდის. მომავალი წლებისთვის უნდა ვიყოთ მზად და არ არის ისე, რომ დღეს არ გვაქვს საშუალებები. ხოლო ის, რომ მივიღეთ საერთაშორისო დახმარება, ეს არის აბსოლუტურად ბუნებრივი პროცესი. პირველ დღეებშივე მქონდა საუბარი ჩემ კოლეგებთან და ყველა მეზობელი ქვეყნის ტრანსპორტის მინისტრი გვთავაზობდა დახმარებას ამ კუთხით. ეს ძალიან ბუნებრივია, ჩვენც თუ რამით შეგვიძლია, გვერდით უნდა დავუდგეთ ჩვენ მეზობელ და პარტნიორ ქვეყნებს“, – განაცხადა დავითაშვილმა.

ცნობისთვის, საქართველოს მთავრობა სამ ახალ ვერტმფრენს შეისყიდის. როგორც პრემიერ-მინისტრმა ირაკლი ღარიბაშვილმა მთავრობის სხდომის დაწყებისას განაცხადა, მთავრობის გადაწყვეტილებით გაყიდიან წინა ხელისუფლების დროს შეძენილ ერთ ძვირადღირებულ ვერტმფრენს, რომელიც მისივე შეფასებით, „ფუფუნებისთვის“ იყო შესყიდული.

209 ნახვა
desktop
mobile catfish