აჭარის უმაღლეს საბჭოში „გახარია - საქართველოსთვის“ წევრები ბოიკოტის რეჟიმს წყვეტენ და რეგიონის საკანონმდებლო ორგანოში საქმიანობას იწყებენ, - ამის შესახებ განცხადება პარტია „გახარია-საქართველოსთვის“ ბათუმის ორგანიზაციის წევრებმა ბრიფინგზე გააკეთეს.

მათი თქმით, ქვეყანაში შექმნილი ვითარებიდან გამომდინარე, სასიცოცხლოდ მნიშვნელოვანია საკანონმდებლო ორგანოდან მოსახლეობის ხმა ისმოდეს.

აჭარის უმაღლეს საბჭოში პარტია „გახარია-საქართველოსთვის“ ორი წევრი - ნინო ჩხეტია და არჩილ სამნიძე იქნებიან წარმოდგენილი.

„ყველასათვის ცნობილია, რომ 26 ოქტომბრის საპარლამენტო და უმაღლესი საბჭოს არჩევნების შემდეგ, ჩვენმა პოლიტიკურმა გუნდმა ერთხმად მიიღო პარლამენტის და პარალელურად, უმაღლესი საბჭოს ბოიკოტის გადაწყვეტილება, თუმცა, დღევანდელმა რეალობამ მკაფიოდ აჩვენა, რომ ერთი წლის წინ პოლიტიკური პროტესტის არჩეულმა ფორმამ არათუ შეაჩერა და დაასუსტა ქართული ოცნების ხელისუფლება, არამედ გააძლიერა იგი, რითაც უმოკლეს დროში „ოცნება“ გადაიქცა თავისვე ქვეყნის პროგრესის უპირველეს შემაფერხებელ შიდა ბოროტ ძალად.

ბოიკოტი აღმოჩნდა არამხოლოდ სახელმწიფოსთვის, არამედ პოლიტიკური პარტიებისთვისაც დამაზიანებელი, რითაც ისარგებლა „ქართულმა ოცნებამ“ და საზოგადოების ორად გაყოფილი აზრის გაძლიერებით მშვიდობიანი პროტესტის გამომხატველი მოსახლეობა მიიყვანა 4 ოქტომბრის პროვოკაციამდე.

ქვეყანაში შექმნილ დღევანდელ ვითარებაში გარკვეულწილად ჩვენი პასუხისმგებლობაცაა, რამეთუ ერთი წლის წინ ჩვენ ვერ შევძელით საზოგადოებისა და პოლიტიკური სპექტრის დარწმუნება, რომ სადეპუტატო მანდატების გაუქმება იქნებოდა შეცდომა, რასაც მოყვებოდა და მოყვა კიდეც ქვეყანაში უკიდურესად დამძიმებული პოლიტიკური თუ სოციალური მდგომარეობა!

თვითმმართველობის არჩევნების დღეს - 4 ოქტომბერს დაანონსებულმა და განხორციელებულმა, ყოვლად გაუმართლებელმა, უპასუხისმგებლო და პროვოკაციულმა პროცესებმა სიტუაცია იმდენად უკიდურესად დაამძიმა ქვეყანაში, რომ დააზიანა და დააპირისპირა ისედაც დასუსტებული ოპოზიციური სპექტრი, რითაც „ოცნებას“ მიეცა საბაბი, საკუთარ მცირერიცხოვან მომხრეებში გაემართლებინა თავისი ავტორიტარიზმის გაძლიერება.

დღეს უკვე ყველასათვის ნათელია, რომ ოპოზიციის პოლიტიკური პროცესებიდან გაქრობამ ხალხი დატოვა დაუცველი რეჟიმის პირისპირ, რომელიც თავისი სახელისუფლებო ძალაუფლების შესანარჩუნებლად არ ერიდება განსხვავებული აზრის დევნას, კრიტიკული აზრის გამომხატველთა დაპატიმრებებს, ყველა განსხვავებული აზრის მქონე პირთა ქვეყნის წინაშე დამნაშავეებად გამოცხადებას და დასჯას. სწორედ ამიტომ ჩვენი მთავარი მიზანია საკანონმდებლო ორგანოებიდან ბრძოლა განსხვავებული, ჯანსაღი და პროგრესული აზრის გადარჩენისთვის!

4 ოქტომბრის შემდგომ შექმნილმა ვითარებამ კიდევ ერთხელ დაგვარწმუნა, რომ პარლამენტისა და უმაღლესი საბჭოს ტრიბუნის არ გამოყენება, განსაკუთრებით ამ რთულ პერიოდში არა მხოლოდ შეცდომა, არამედ დანაშაულია ქვეყნისა და ხალხის წინაშე.

ჩვენი პარტია გამუდმებით ვამტკიცებდით, რომ მოსახლეობის მხრიდან ნდობაშემცირებულ ხელისუფლებასთან ბრძოლის ერთადერთი კანონიერი გზაა არჩევნები და შედეგად მიღებული მანდატების აქტიურად გამოყენება ქვეყნის თუ მოსახლეობის უკეთესი მომავლისათვის.

ჩვენი დღევანდელი განცხადებით კიდევ ერთხელ ვადასტურებთ, რომ ქვეყანაში შექმნილი ვითარების გათვალისწინებით, სასიცოცხლოდ მნიშვნელოვნად მიგვაჩნია როგორც პარლამენტსა თუ საკრებულოებში, ასევე აჭარის უმაღლეს საბჭოში ისმოდეს საქართველოს მოქალაქეების - ჩვენი რეგიონის მოსახლეობის განსხვავებული აზრი. სწორედ ამიტომაც გავდივართ ბოიკოტის რეჟიმიდან და ვიწყებთ აქტიურ ჩართულობას ყველა საკანონმდებლო, წარმომადგენლობით ორგანოებში, რათა ქვეყნის პოლიტიკურ ცხოვრებაში ასახვა პოვოს ჩვენი მოსახლეობის რეალურმა მოთხოვნებმა, რათა ეტაპობრივად ქვეყანა დავაბრუნოთ კონსტიტუციური და დემოკრატიული განვითარების ჩარჩოში“, - განაცხადეს აჭარის უმაღლეს საბჭოში პარტია „გახარია საქართველოსთვის“ წევრებმა.