დღეს დადგა სხვა დრო - საზოგადოების დაკვეთაა, რომ აუცილებელია წინააღმდეგობის პლატფორმა გაიზარდოს და არ იყოს მონოპოლია იმ პოლიტიკური პარტიების, რომლებმაც აქამდე ვერ აჩვენეს, რომ მხოლოდ თვითონ შეუძლიათ მართონ სიტუაცია - პლატფორმა უნდა გაიზარდოს და ამაზე ვმუშაობთ. შეიძლება რაღაც ჯგუფები შეიქმნას, - ამის შესახებ მეხუთე პრეზიდენტმა სალომე ზურაბიშვილმა 2024 წლის დეკემბრის აქციაზე დაკავებულთათვის უფასო იურიდიული დახმარების მიზნით შექმნილი იურისტთა ჯგუფისა და პატიმრების ოჯახის წევრებთან შეხვედრის დროს განაცხადა.

როგორც სალომე ზურაბიშვილმა აღნიშნა, პარტნიორები შეხვედრისას ეკითხებიან „სად არის თქვენი პოლიტიკური ალტერნატივა?“. მისი განმარტებით, საჭიროა ალტერნატივის ჩვენება და ის, რომ „როცა ესენი ჩამოიშლებიან, შეგვიძლია რომ ქვეყანა ხელში ავიყვანოთ და სტაბილურობა დავიჭიროთ“.

ამასთან, სალომე ზურაბიშვილმა ერთიანობის მნიშვნელობაზე ისაუბრა.

„მეუბნებიან, რომ ერთად მოიტანეთ საკითხები, რაც გულისხმობს პოლიტიკურ საკითხებსა და დანარჩენ ჯგუფებს, მეუბნებიან იმიტომ, რომ მათ ჰქონდეთ განცდა იმისა, რომ საქართველო რეალურად ერთი ხმით საუბრობს, რაც მიღწეული არ არის. თუ ვაღიარებთ ჩვენ პრობლემებს, უნდა ვიცოდეთ, რა არის.

მე რაც დავიწყე ამ ქვეყანაში მოღვაწეობა სულ იმაზე ვმუშაობ, რომ ერთობა შეიქმნას. ერთობა ჩემთვის არ არის ერთპარტიულობა და ამ პარტიების რაღაცნაირად ხელოვნური შეჯამება იმიტომ, რომ ჩვენ თუ გვინდა ხვალინდელი დემოკრატია გვინდა მრავალფეროვნება და გვინდა ყველას ჰქონდეს თავისი იდენტობა. არის მომენტები, როდესაც შენ ებრძვი შიგნით ავტორიტარიზმს და გარეთ რუსეთს, თუ შიგნით რუსეთს, აღარ ვიცი უკვე, აქ ადგილი აღარ არის იმაზე [სასაუბროდ], რომ „მე ჩემი იდენტობა, ჩემი რაღაც“ - ამას ყველა ერთად უნდა ვებრძოლოთ.

ჩემი პრეზიდენტობის მანდატი ეროვნული თანხმობით დავიწყე, ეს მომენტი ამ ქვეყანაში დაბრუნდება. ამ კოშმარიდან და ტრაგედიიდან რომ გამოვალთ, ეროვნული თანხმობა დაგვჭირდება იმისთვის, რომ ქვეყანა ქვეყნად ვაქციოთ ხელახლა. მერე იყო ქარტია, ქარტია ძალაში არის. ვნახავთ, თუ არის რაღაცები შესასწორებელი იმიტომ, რაც დრო გადის, რაღაცები დასამატებელია, მაგრამ მისი სულისკვეთება უცვლელია. არავინ გასულა იმ ქარტიიდან, არავის უთქვამს, რომ მე აღარ ვუჭერ მხარს. მე არ ვიცი, სხვა დოკუმენტი, რომელზედაც სხვადასხვა პოლიტიკური ძალის ამდენი თანხმობაა. შემდეგ იყო წინააღმდეგობის პლატფორმა, სადაც იყვნენ მხოლოდ პოლიტიკური პარტიები და ვნახეთ, მათ შორის, რა მოხდა, თუნდაც მარტივი შეთანხმება იმაზე, თუ რა უნდა ყოფილიყო პოზიცია ადგილობრივ არჩევნებზე არც ისეთი მარტივი აღმოჩნდა, მაგრამ ეს პლატფორმა, თავისთავად, როგორც წინააღმდეგობის პლატფორმა არსებობს. მე არც ერთხელ არ მითქვამს, რომ პლატფორმა დაიხურა, მაგრამ დღეს დადგა სხვა დრო - საზოგადოების დაკვეთაა, რომ აუცილებელია ეს პლატფორმა გაიზარდოს და არ იყოს მონოპოლია იმ პოლიტიკური პარტიების, რომლებმაც აქამდე ვერ აჩვენეს, რომ რეალურად შეუძლიათ მართონ სიტუაცია მხოლოდ თვითონ. დღეს საზოგადოებაში სხვა წონის აქცენტები გაჩნდა და საზოგადოებაში პროტესტია. პატიმრები და მათი ოჯახები, სხვადასხვა წრე, რომლებიც შეიძლება აქტივისტები არ არიან და ყოველ დღე ქუჩაში არ დგანან, მაგრამ რომლებიც ჩნდებიან, როგორც ადამიანები და ჯგუფები, თუნდაც იურისტების ჯგუფი და ა.შ. ეს პლატფორმა ამ ფორმით უნდა გაიზარდოს და ამაზე ვმუშაობთ. შეიძლება რაღაც ჯგუფები შეიქმნას. ყველაფერი რთულია ამ ქვეყანაში, მაგრამ ამასაც მივაღწევთ იმიტომ, რომ დაკვეთა არის საზოგადოების, დაკვეთა არის გარეთ. ჩემი არც ერთი გასვლა გარეთ ან ინტერვიუ, არ არსებობს ისეთი, სადაც არ მეკითხებიან, სად არის თქვენი პოლიტიკური ალტერნატივა? და სანამ არ დავანახებთ, რომ არის პოლიტიკური ალტერნატივა, რომელიც არ გულისხმობს მხოლოდ პოლიტიკურ პარტიებს, რომელთა ნაწილიც დღეს, სამწუხაროდ, ციხეში და ნაწილი რესურსების გარეშეა, სანამ არ დავანახებთ, რომ როცა ესენი ჩამოიშლებიან, შეგვიძლია რომ ქვეყანა ხელში ავიყვანოთ და სტაბილურობა დავიჭიროთ. ამას ელოდება საზოგადოება, რომ უფრო გამბედავად დაუჭიროს მხარი პროტესტს და ამას ელოდებიან ჩვენი პარტნიორები. ბუნებრივია, უყურებენ ქვეყანას და ფიქრობენ: ესენი გავიგეთ, ვინ არიან და რა არიან, მაგრამ ესენი თუ არა, ვინ იქნება და რა იქნება?“ - განაცხადა ზურაბიშვილმა.