როგორც იქნა ვიპოვე ჩემი თავი და წარმოვადგინე სუს-ში- ყველა ჩემი განცხადება ეფუძნებოდა ღია წყაროებიდან მოპოვებულ ინფორმაციას, შესაბამისად, არაფერი დასასაბუთებელი არ მაქვს,- ამის შესახებ ოპოზიციონერმა პოლიტიკოსმა, გივი თარგამაძემ სახელმწიფო უსაფრთხოების სამსახურში გამოკითხვაზე შესვლამდე განაცხადა.

როგორც თარგამაძემ აღნიშნა, სათქმელი ძალიან ბევრი აქვს, მაგრამ არ იცის, მოუსმენენ თუ არა.

„მოგესალმებით, როგორც იქნა ვიპოვე ჩემი თავი და წარმოვადგინე სუს-ში. არ მჭირდება არანაირი სასამართლო, მითუმეტეს კიდევ დამატებით სუს-ის კონტროლირებადი ერთი ფიგურა მოსამართლე არ მჭირდება, რომ ამათ დაველაპარაკო. სათქმელი ძალიან ბევრი მაქვს, არ ვიცი მომისმენენ თუ არა. მაგალითად ის, რომ მიხედონ საქმეს.

ყველა ჩემი განცხადება ეფუძნებოდა ღია წყაროებიდან მოპოვებულ ინფორმაციას, შესაბამისად, არაფერი დასასაბუთებელი არ მაქვს. მათ აქვთ დასასაბუთებელი, რატომ დამიძახეს ამ განცხადებებთან დაკავშირებით, იმის ნაცვლად რომ საქმეს მიხედონ, როდესაც აქ ჰკითხავენ ჩემნაირ ადამიანებს. 300 კაცი უდგათ, რომელიც მზად არის აიათოლას ბრძანების შესასრულებლად. წავიდნენ, 300 ადამიანი გააკონტროლონ, ისინი თუ გაიფანტნენ მთელ მსოფლიოში დავალებებით, რაც მიღებული აქვთ და არ იციან, ამათ, რა აქვთ მიღებული, შემდეგ იქნება ჩვენი ქვეყანა შარში, თუ იქნება.

ეს არის საფრთხე, როდესაც ტერორიზმის გამო სანქცირებული უნივერსიტეტი მუშაობს, ჯგრიალებს ამ ქვეყანაში, ზუსტად ამ პირობებში, ეს არის საფრთხე. მე რა უნდა დავასაბუთო? ამას დასაბუთება არ სჭირდება. მგონი, ტროტუარზე დგომაზე აქვთ კანონი მაგრამ ლოგიკურ მსჯელობაზე და უკვე მომხდარი ფაქტების გაანალიზების შედეგად გონივრულ ეჭვზე კანონი ჯერ არ აქვთ და შეიძლება ჰქონდეთ შემდეგ. წახალისება არის, როდესაც სუსი ამას არ უშლის ხელს, ეს არის წახალისება,- აღნიშნავს თარგამაძე.