4 ოქტომბერს განვითარებულ მოვლენებთან დაკავშირებით დაკავებულ მიხეილ თოლორაიას ადვოკატის, ბორის ჩელე ყურუას განმარტებით, მისი დაცვის ქვეშ მყოფი სპეცრაზმმა სახლში, მცირეწლოვანი შვილის თანდასწრებით დააკავა.

თოლორაია ზაჰესის დროებითი მოთავსების იზოლატორშია შესახლებული. ბრალი ამ დროისთვის, არც მისთვისაა წარდგენილი.

„თავის საცხოვრებელ მისამართზე იმყოფებოდა. განსაკუთრებული საპოლიციო ღონისძიებით მოხდა მისი დაკავება, იარაღებით, სპეცრაზმით შეუვარდნენ ადამიანს, რომელიც არსად იმალებოდა, არსად გარბოდა, სახლში ჰყავს მცირეწლოვანი შვილი, რომლის თვალწინაც მოხდა თოლორაიას გაკოჭილი სახლიდან გაყვანა. მას არ აქვს მოლოდინი, რომ ამ სასამართლოში სამართალს იპოვის, მოლოდინი აქვს, რომ მოსამართლე არაფერს გაითვალისწინებს და აღკვეთის ღონისძიების სახით პატიმრობას შეუფარდებს. ბრალის წარდგენა ოფიციალურად არ მომხდარა, სავარაუდოდ, მას სტრატეგიული ობიექტის ხელში ჩაგდების მცდელობასა და ჯგუფურ ძალადობაში მონაწილეობას ედავებიან.

მიხეილ თოლორაია პატიოსანი, მშრომელი ადამიანია, რომელიც კანონთან კონფლიქტში არასდროს ყოფილა“, - განაცხადა ყურუამ.

ცნობისთვის, სამართალდამცავებმა 4 ოქტომბერს განვითარებულ მოვლენებთან დაკავშირებით, რამდენიმე აქტივისტი დააკავეს.

დაკავებულებს შორის არიან, მარიამ მეყანწიშვილი, დავით გიუნაშვილი, სიმონ მახარაძე, დავით ღურწკაია, გიორგი ტალახაძე, გია თოლორაია, მიხეილ თოლორაია და თემურ ქურციკიძე.